Канада Johnson & Johnson вакцинасидан фойдаланишни вақтинча тўхтатди

Канада ҳукумати Американинг Johnson & Johnson компаниясига тегишли коронавирус вакцинасидан фойдаланишни вақтинча тўхтатди. Бу ҳақда мамлакат Соғлиқни сақлаш вазирлигига таяниб, CBC хабар берди.

Қарор Канадага кириб келган препаратнинг дозалари Балтимордаги American Emergent заводида ишлаб чиқарилгани маълум бўлгандан кейин қабул қилинди. Аввалроқ The New York Times газетаси ушбу заводда 15 миллион доза Johnson & Johnson вакциналари яроқсиз ҳолга келиб қолгани ҳақида хабар берган эди.

Вакцина Соғлиқни сақлаш вазирлигининг «сифат, хавфсизлик ва самарадорликнинг юқори стандартларига жавоб бериши» талабларига жавоб берсагина, тарқатиш учун рухсат берилади, дейилган вазирлик хабарида.

CBC’нинг таъкидлашича, бу ҳафтада Канадага 300 минг доза Johnson & Johnson вакцинаси олиб келинди.

Балтимордаги заводда Johnson & Johnson ва AstraZeneca компанияларининг коронавирусга қарши вакциналари ишлаб чиқарилаётган эди. The New York Times газетасининг маълумотларига кўра, Emergent BioSolutions тасодифан икки вакцинанинг ингредиентларини аралаштириб юборган. Johnson & Johnson раҳбарияти препаратнинг ўша партияси сифат назоратидан ўтмаганини таъкидлади.

Бу воқеадан кейин Жо Байден маъмурияти завод фаолиятини Johnson & Johnson назорати остига топширди, AstraZeneca вакцинасини ишлаб чиқариш эса тўхтатилди.

Канада Соғлиқни сақлаш вазирлиги мамлакатга худди шу заводдан олиб келинган 1,5 миллион дозага яқин AstraZeneca вакцинаси сифат талабларига жавоб беради, деб ҳисоблайди.

13 апрель куни Johnson & Johnson вакцинаси билан эмланган олти нафар аёлда тромблар ҳосил бўлгани маълум бўлгач, АҚШ компания вакцинасидан фойдаланишни тўхтатди. «Уларнинг пайдо бўлишига сабаб тромбоцитлар фаоллашишига олиб келадиган кам учрайдиган иммун реакцияси бўлиши мумкин», — деди АҚШ Озиқ-овқатлар ва дорилар сифати бошқармаси (FDA) тадқиқот марказларидан бирининг директори Питер Маркс.

24 апрель куни, препаратнинг фойдаси унинг хавфидан устун эканини айтган мутахассисларнинг тавсиясидан кейин назоратчилар уни ишлатишга қайта рухсат берди.

Жанубий Африкада ҳам Johnson & Johnson вакцинасидан фойдаланиш вақтинча тўхтатилди. Вакцинани рад этиш Африканинг коронавирусдан энг кўп азият чеккан ушбу мамлакатида эмлаш кампаниясини кечиктиради.

Маълумот учун Johnson & Johnson компаниясининг вакцинасидан фойдаланиш АҚШда февраль ойида, Европа Иттифоқида эса март ойида тасдиқланган. 12 апрель ҳолатига кўра, Johnson & Johnson АҚШга 6,8 миллион дозадаги вакцинани етказиб берган.