Италиялик «Робинзон Крузо» ўзи ёлғизликда 32 йил яшаган оролни тарк этади
Италиялик «Робинзон Крузо» сифатида танилган Мауро Моранди ўзи 32 йил давомида яшаган Буделли оролини тарк этади. Бу ҳақда BBC News хабар берди.
Моранди қўшни оролдаги уйга кўчиб ўтишини айтди.
«Келажакда Буделли, мен 32 йил давомида ҳимоя қилганим каби, ҳимояланган ҳолатда бўлади деган умид билан бу ерни тарк этаман», — деб қўшимча қилди у.
Орол Ла-Маддалена миллий боғида жойлашган бўлиб, шу номдаги архипелаг таркибига киради. Моранди 1989 йилда табиатга яқин яшаш ва цивилизациядан қочиш мақсадида Полинезияга йўл олган ва Буделлига келган. Унинг сўзларига кўра, у Италиядаги сиёсий вазият ва жамиятдаги истеъмолчиликдан норози бўлган.
Моранди ўзигача Буделлида яшаган назоратчининг ўрнини эгаллашга келишиб олган ва унинг вазифаларини бажара бошлаган. У Иккинчи жаҳон уруши даврида қурилган эски радиостанция биносида яшаган. 2020 йилда ҳукумат 81 ёшли италияликнинг бошпанасини ноқонуний таъмирлаганликда айблаб, унинг бошқа жойга кўчиб ўтишини талаб қила бошлади.
Ўшанда Морандини қўллаб-қувватловчилар петицияси 70 мингдан ортиқ имзо тўплаган ва Италия ҳукумати унинг қолишига рухсат берган.
Аввалроқ Амазонкадаги жума қабиласининг энг охирги вакили Арука Жума ва АҚШда биргаликда 67 йил умр кечирган Билл ва Эстер Илнски бир неча дақиқа фарқ билан коронавирусдан вафот этгани ҳақида хабар берилган эди.
Шунингдек, сураткаш Александр Химушин, тахминан, 12 йил аввал йўқолиб кетиш арафасида турган кичик халқлар ва этник қабилаларни излаш учун саёҳатга йўл олганди, унинг мақсади уларни портретларда абадийлаштириш эди. 2019 йил БМТ кўргазмасида The World in Faces лойиҳасида унинг ижод намуналари юқори баҳоланди.
