Индонезияда чўкиб кетган сувости кемасининг экипажи ҳалокатдан олдин таъсирли видео ёзиб қолдирди (видео)

Индонезия ҳарбий денгиз кучларига тегишли чўкиб кетган сувости кемаси экипажининг ўз кемасида қўшиқ куйлаётгани тасвирланган таъсирли видео пайдо бўлди. Видео фожиа юз беришидан бир неча ҳафта олдин ёзилган, деб хабар берди Republicworld.

Тармоқда пайдо бўлган видеода экипаж аъзолари кема капитани билан Индонезияда хит бўлган қўшиқлардан бири — Sampai Jumpa’ни («Кечроқ учрашамиз») куйлаганини кўриш мумкин.

«Мен сени соғинишга қодир бўлмасам-да, сенсиз яшашга тайёр эмасман. Сенга фақат яхшиликлар тилайман», — дея қўшиқ сатрларидан таржималар келтирди нашр.

https://www.instagram.com/p/CODev36loho/

Хабар берилишича, ушбу ёзув сувости кемалари корпусини тарк этаётган қўмондон билан хайрлашув сифатида тайёрланган.

Эслатиб ўтамиз, 21 апрель куни Бали яқинидаги ўқув машғулотларда KRI Nanggala 402 сувости кемаси билан алоқа узилиб қолган ва у бедарак йўқолган. Кейинчалик АҚШ Индонезиянинг ғойиб бўлган сувости кемасини қидириш учун авиация юбориши, бедарак йўқолган сувости кемасида кислород тамом бўлгани ҳақида хабарлар берилган. Содир бўлган воқеанинг келиб чиқиш сабаблари юзасидан расмий тахминлар билдирилмаган.

25 апрель куни сувости кемасининг қолдиқлари топилгани ва кеманинг барча экипажи қурбон бўлгани эълон қилинди.