Чироқчида 1-синфда ўқувчи қиз ЙТҲ оқибатида вафот этгач, бир гуруҳ аёллар йўл тўсди

Қашқадарёнинг Чироқчи тумани «Қумдарё» маҳалла фуқаролар йиғини Оқтўнли қишлоғида яшовчи бир гуруҳ аёллар 23 апрель куни «Қарши—Самарқанд» йўлининг «Хўжаобод» маҳалла фуқаролар йиғини Хўжаобод қишлоғи ҳудудидан ўтувчи қисмини норозилик тариқасида тўсиб қўйган. Бунга икки кун шу йўлни кесиб ўтишга уриниш вақтида юз берган йўл-транспорт ҳодисасида хўжаободлик 1-синфда ўқувчи қизнинг вафот этгани сабаб бўлган.

Қашқадарё вилоят ИИБ хабарига кўра, 21 апрель куни А-378 «Самарқанд—Ғузор» йўлидан Самарқанд томон ҳаракатланиб келаётган Isuzu юк машинаси пиёдалар йўлакчаси орқали йўлни кесиб ўтаётган 1-синф ўқувчиси Д.Э.ни уриб юборган. Оғир тан жароҳати олган бола Чироқчи тумани «Кўкдала» касалхонасида вафот этган. ИИБ ахборотида таъкидланишича, ҳолат юзасидан жиноят иши қўзғатилган, ҳайдовчи шу куннинг ўзида қамоққа олинган.

ЙТҲнинг эртасига, 22 апрель куни Чироқчи тумани мутасадди раҳбарлари фуқаролар билан учрашган. Учрашувда «Қумдарё» маҳалла фуқаролар йиғинида яшовчи аҳоли ўзлари яшайдиган қишлоқда қурилиши режалаштирилган мактабнинг тезроқ қуриб берилишини сўраб, қўшни қишлоқдаги мактабга боришда «Самарқанд—Қарши» йўлини кесиб ўтиш болалар учун хавфли эканини билдирган. Қашқадарё вилояти ҳокимлиги ахборотига кўра, «Истиқлол» қўрғончасида 99-мактаб филиалига 176 ўринли янги мактаб қурилиши режалаштирилгани, у янги ўқув йили бошланишида фойдаланишга топширилиши «қишлоқ аҳлига бот-бот тушунтирилган».

«Афсуски, баъзи фуқаролар мутасаддиларнинг сўзларига эътибор қилмай, ўз билганича иш тутди», — деб ёзади вазият юзасидан «Chiroqchi.uz». Интернет-нашрнинг алоҳида қайд этишича, қишлоқ аёллари 1-синф ўқувчисининг ўлимидан «ўзларини йўқотиб қўйгани» учун шу ишга қўл урган. Қашқадарё вилоят ИИБнинг қўшимча қилишича, қумдарёлик аёлларнинг мактаб қурилишини тезлаштириш талаби билан 23 апрель куни йўлни тўсиб қўйиши оқибатида қисқа муддатга автомашиналарнинг ҳаракатланиши тўхтаган.

«Шу ўринда, вилоят ҳокими Зойир Мирзаев марҳума Д.Э.нинг вафоти муносабати билан унинг оила аъзоларига ҳамдардлик билдиради ва вазиятни тўлиқ назоратга олганини ҳамда янги мактаб қурилиши август ойида якунланишини маълум қиламиз», — дейилади Қашқадарё вилояти ҳокимлиги ахборотида. «Chiroqchi.uz»нинг қўшимча қилишича, мактаб қурилиши 2021 йил иккинчи чорагида бошланади, ҳозирда буюртмачи Қашқадарё вилояти «Ягона инжинеринг хизмати» томонидан пудратчи ташкилотлар танловини ўтказиш ишлари олиб борилмоқда.