Volkswagen футбол бўйича Ўзбекистон Про-Лигасининг расмий ҳомийсига айланди

Ўзбекистон Про-Лигаси Германиянинг Volkswagen бренди билан ҳомийлик шартномаси имзолади. Бу ҳақда ПФЛ матбуот хизмати маълум қилди.

ПФЛ, Volkswagen ва UzReport ўртасидаги уч томонлама шартнома имзоланган. Унга кўра, Volkswagen Про-Лигага оид барча трансляциялар, тадбир ва учрашувлар давомидаги тижорий баннерлар, реклама роликлари ҳамда медиа маҳсулотлари орасидан жой эгаллайди.

«Умид қиламизки, Volkswagen билан мазкур ҳамкорлик Ўзбекистон футболи ривожи йўлидаги яна бир дадил қадам бўла олади», — дейилади ПФЛ баёнотида.

Эслатиб ўтамиз, ПФЛ Про-Лига ўйинларини мунтазам жонли эфирга узатиш борасида 2020 йилда UzReport билан келишувга эришганди. 2021 йилги мавсумдан мусобақанинг қатор учрашувлари телеканал тармоғида жонли эфирга узатилмоқда.