Тошкент шаҳар ҳокими ўринбосари Фурқат Маҳмудхўжаев ҳуқуқ-тартибот идоралари пойтахтда ноқонуний реклама конструкциялари пайдо бўлгани, лекин бунга ҳеч ким эътибор бермаганига ҳуқуқий баҳо бериши кераклигини айтди. Бу ҳақда у ташқи реклама баннерлари билан боғлиқ муаммолар тўғрисида Тошкентда ўтказилган очиқ мулоқотдан сўнг «Ўзбекистон 24» телеканалига маълум қилган.
«Бугун биз бир-бирига қарама-қарши фикрларни эшитдик. Бу тўғри ва нормал ҳолат. Айтадилар-ку, ҳақиқат — ўртада. Ушбу очиқ мулоқот бизга олтин ўрталикни топишга ёрдам беради. Жуда тўғри гапирилди. Шундай ноқонуний қурилмалар пайдо бўлган экан, нега шу вақтгача ҳеч ким бунга эътибор қаратмади ва нима учун шу пайтга келиб энди ҳаракат қилишни бошладик? Дарҳақиқат, бу фикрга қўшиламан, ҳуқуқ-тартибот идоралари ушбу фаолиятга ўз баҳосини беради деб ўйлайман. Бошқа томондан, ушбу конструкцияларни ким ўрнатди? Уларнинг жавобгарлиги қай даражада?» — деган Фурқат Маҳмудхўжаев.
Эслатиб ўтамиз, Тошкент шаҳрида 8 апрелдан бошлаб реклама конструкцияларини оммавий бузиб ташлаш ишлари амалга оширилмоқда. Ташқи реклама объектларининг эгалари конструкциялар қонун бўйича ўрнатилгани, «снос» бўйича кўрсатма «юқоридан» бўлганини маълум қилган. Тадбиркорлар ҳозирга қадар 300 дан ортиқ баннерларни олиб ташлаган ҳукуматнинг ҳаракатини ноқонуний деб атаб, бу борада тушунтириш талаб қилмоқда.
Савдо-саноат палатаси реклама баннерлари нима сабабдан бузилаётганига ойдинлик киритиш мақсадида Тошкент ҳокимлигига сўров юборди. Монополияга қарши курашиш қўмитаси Тошкент шаҳрида жойлашган 6630 та конструкциянинг 3207 таси ёки 50 фоизга яқинида камчилик аниқланганини маълум қилди.
Изоҳ (0)