Сирдарёдаги банкда 81 минг евро қалбаки валюта аниқланди
«Қишлоққурилишбанк» Сирдарё минтақавий филиалида 81 000 евро миқдоридаги қалбаки валюта аниқланган. Бу ҳақда банк ахборот хизмати хабар берди.
Қайд этилишича, мазкур ҳолат бўйича ҳужжатлар тегишли тартибда расмийлаштирилиб, қонуний баҳо бериш мақсадида Сирдарё вилояти Ички ишлар бошқармасига тақдим қилинган.
Мазкур ҳолат бўйича жиноят иши очилган ва суриштирув-тергов ишлари олиб борилмоқда.
Ҳолат юзасидан суриштирув-тергов ишлари якунлангач, қўшимча маълумотлар эълон қилиниши маълум қилинган.
Бундан аввал Жиззахда сохта дипломга эга 10 та мактаб ўқитувчиси қўлга олингани, Учтепада қалбаки 6350 долларни муомалага киритмоқчи бўлган шахс аниқлангани ҳамда Андижонда қалбаки долларлар эвазига 9 та iPhone 12 сотиб олишга, Наманганда эса қалбаки пулларни банкка ўтказишга уринган шахслар ушлангани ҳақида хабар берилганди.
