Фарғонада оилали эркакка никоҳ ўқиган 63 ёшли отахонга 1 йил озодликдан чеклаш жазоси тайинланди

Фарғона вилояти Ёзёвон туманида истиқомат қилувчи 63 ёшли отахон оилали эркакка никоҳ ўқигани учун жазоланди. Бу ҳақда «Бу кун» информацион дастурида хабар қилинди.

Қайд этилишича, Ёзёвон туманида яшовчи 63 ёшли фуқаро 2020 йил 15 сентябрь куни шу туманда яшовчи қонуний никоҳдан ўтмаган фуқаро У. ва Р.ни 30 минг сўм эвазига шаръий никоҳдан ўтказган.

«Келиб, илтимос қилгани учун йўқ деёлмадим. Ҳамманинг олдида жиноятчи бўлиб телевидениега чиқишни хоҳламасдим. Чунки ҳаммага ўрнак бўлиб келган одам эдим», — дейди айбланувчи.

Маълум қилинишича, 63 ёшли шахсга бундан аввал, 2020 йил 6 августда айнан ушбу қоидабузарлик учун суд ҳукми ўқилган ва БҲМнинг 5 баробари миқдорида жарима тайинланган.

Навбатдаги ҳолат юзасидан Ёзёвон тумани суди томонидан отахонга нисбатан 1 йил муддатга озодликдан чеклаш жазоси тайинланган.

Бундан аввал Фарғонада ноқонуний никоҳ ўқиганига чора кўрмаслик учун профилактика инспекторига 2 миллион сўм пора таклиф қилган шахс ушлангани, Андижонда танишига шаръий никоҳ ўқиган фуқаро 15 суткага қамалгани ҳамда Андижонда ўғлига шаръий никоҳ ўқиган ота 3 суткага қамалгани ҳақида хабар берилганди.