Оқ уй Россияга қарши киритилган санкцияларнинг натижаларига баҳо берди

АҚШ томонидан Россияга қарши киритилган санкцияларнинг оқибатлари ҳозирча президент Жо Байден маъмурияти кутган натижаларга «жуда яқин», деди АҚШ президентининг миллий хавфсизлик бўйича ёрдамчисининг ўринбосари Далип Сингҳ Reuters агентлигига берган интервьюсида.

«Бизнинг мақсадимиз муносиб равишда ҳаракат қилиш ва шунга мувофиқ ёндашиш, шунингдек, Россия ўз хатти-ҳаракатларини давом эттириб, эскалацияни кучайтирган тақдирда, биз бундан ҳам кўпроқ зарар етказиш имкониятига эга эканимизга ишора бериш эди», — деди у.

Сингҳнинг сўзларига кўра, ҳозирча натижалар АҚШнинг режалаштирганларига «жуда яқин» турибди.

«Санкциялар шунчаки стратегияни ривожлантиришга ёрдам берадиган восита ва дипломатик жараён учун дастак яратиш ҳисобланади», — деди Сингҳ. «Россия мисолида эса ушбу жараённинг мақсади янада барқарор ва тахмин қилса бўладиган муносабатлар ўрнатишдир», — деб қўшимча қилди у.

Ўтган ҳафтада Байден Россияга қарши янги санкциялар жорий қилди. Америка банклари ва бошқа молия институтларига бирламчи бозорда Марказий банк, Миллий бойлик жамғармаси ёки Россия Молия вазирлиги томонидан 2021 йил 14 июндан кейин рубль ва бошқа валюталарда чиқарилган облигацияларни сотиб олиш ва уларга кредит бериш тақиқланди.

Ўз ўрнида, Кремль АҚШнинг янги санкциялари сабабли иқтисодиёт учун ҳеч қандай таҳдид кўрмаётганини таъкидлади. «Фақат шуни такрорлашим мумкинки, макромувозанат тўлиқ таъминланган, бизнинг тартибга солувчиларимиз ишончли ва муваффақиятли ҳаракат қилмоқда», — деди президент матбуот котиби Дмитрий Песков. Бунгача у бир неча бор Вашингтоннинг «санкциялар тарафкашлиги» Москва учун «қабул қилиб бўлмас»лигини таъкидлаган эди.

Шунингдек, АҚШ ўнта россиялик дипломатни мамлакатдан чиқариб юборишга қарор қилди. Вашингтон маълумотларига кўра, улар орасида разведка хизмати ходимлари ҳам бор. АҚШ ҳукумати президентлик сайловларида қилинган хакерлик ҳужумларига, «Қримни босиб олиш» ва у ерда инсон ҳуқуқларининг бузилишига алоқадор деб ҳисоблаган бир қатор жисмоний шахслар ва ташкилотларга ҳам санкциялар киритган эди.

Аввалроқ АҚШ мухолифатчи Алексей Навальнийнинг қамоққа олиниши муносабати билан ҳам Россияга санкциялар киритган эди. Жазони ижро этиш федерал хизмати раҳбари Александр Калашников, Федерал хавфсизлик хизмати раҳбари Александр Бортников, бош прокурор Игорь Краснов, президент маъмурияти раҳбарининг биринчи ўринбосари Сергей Кириенко ва ички сиёсат бўйича президент маъмурияти девонининг раҳбари Андрей Яринга нисбатан чеклов чоралари қўлланилди.

АҚШ янги санкцияларни қўллаганидан кейин Россия дарҳол жавоб чоралари кўрилишини эълон қилди. Москва АҚШ маъмуриятининг олти нафар амалдаги ва икки нафар собиқ юқори лавозимли амалдорларига мамлакатга киришни тақиқлаб қўйди. Улар орасида бош прокурор Меррик Гарланд, ички сиёсат масалаларида АҚШ президентининг маслаҳатчиси Сюзан Райс, ФҚБ директори Кристофер Рей, Миллий разведка бошқармаси раҳбари Эврил Хейнс каби амалдорлар бор. Улар Россияни 21 майгача тарк этиши керак.

Бундан ташқари, Москва АҚШ элчиси Жон Салливанга «маслаҳатлашиш учун» Вашингтонга жўнаб кетишни маслаҳат берганидан кейин элчи ҳам ватанига қайтиб келди. Давлат департаментининг хабар беришича, Салливан бир неча ҳафта АҚШда бўлади. Элчининг сўзларига кўра, у Путин ва Байденнинг эҳтимолий учрашувидан олдин Москвага қайтишни режалаштирмоқда.