Бухорода фирибгарлик йўли билан пулни қўлга киритган аёлга нисбатан жиноят иши қўзғатилди. Бу ҳақда ИИВ Тергов департаменти хабар берди.
Маълум қилинишича, 32 ёшли аёл Х.С. 2021 йилнинг март ойида 31 ёшли Т.Ш. исмли йигитнинг севган қизини «иссиқ-совуқ» йўли билан қайтариб беришни ваъда қилиб, ундан 3 минг долларни алдов йўли билан қўлга киритган.
Ҳолат юзасидан Бухоро шаҳри бўйича ИИО ФМБ ҳузуридаги Тергов бўлими томонидан Х.С.га нисбатан Жиноят кодексининг 168-моддаси 2-қисми «а» банди (анча миқдорда фирибгарлик) билан жиноят иши қўзғатилган.
Таъкидланишича, тергов ҳаракатлари давомида Х.С.нинг бошқа жиноятга алоқадорлиги текширилиб, ҳуқуқий баҳо берилиши таъминланади.
Ҳозирда тергов ишлари давом этмоқда.
Аввалроқ Қашқадарёда 14 ёшли қизнинг «бошини айлантириб», отасига тегишли 7,3 минг долларни қўлга киритган йигит ушлангани, Сурхондарёда 10 миллион сўм эвазига эр-хотин ажримини тезлаштиришни ваъда қилган сохта адвокат қўлга олингани ҳақида хабар берилган эди.
Изоҳ (0)