Ўзбекистон халқ артисти Мирза Азизовнинг ўлимидан сўнг унинг рафиқаси, таниқли хонанда Тожибар Азизова ҳам коронавирусга чалиниб, оғир аҳволда эканлиги ҳақида гап-сўзлар тарқалган эди. 22 апрель куни Тожибар Азизова турмуш ўртоғининг ўлимидан сўнг илк марта кўриниш бериб, ўзининг ҳам, қизининг ҳам аҳволи яхшилигини маълум қилди.
Актриса Зарнигор Ғаниева Мирза Азизов хонадонидаги ифторлик акс этган видеони Instagram’даги саҳифасига жойлади. Унда Муқимий театри актрисаси Гулчеҳра Носирова ҳам кўриниш берган.
«Биламан, ушбу оилани бутун томошабинлар ҳурмат қилишади, шу қаторда биз ҳам. Муқимий номидаги театр ижодкорлари мана шу оилани ҳурмат қиламиз. Бугун Мирзахонни биринчи пайшанба кунлари ҳаммамиз йиғилиб, эркакларга эҳсон берилди, ифторлик қилинди. Ҳаммасига мана бизнинг дугонамиз Тожибархон бош-қош бўлиб турибдилар. Умрлари узоқ бўлсин, илоҳим», — дейди Гулчеҳра Носирова.
Видеода Тожибар Азизова ўзининг саломатлигидан хавотир олаётган мухлисларига мурожаат қилиб, аҳволи яхши эканлигини айтади.
«Мен жудаям яхшиман, соғлиғим жудаям яхши. Мана бугун биринчи пайшанбаликларини ўтказдик. Маҳалламизга, театрнинг энг катта, улуғ инсонларини чақириб, эҳсон қилдик қўлдан келганча. Илоҳим, хўжайинимнинг жойлари жаннатдан бўлсин, охиратлари обод бўлсин. Бугунги ёзган дастурхонимиз олдиларига чиройли бир дастурхон бўлиб борсин. Мен жудаям яхшиман, қизимам яхши юрибди. Соғ бўлинглар, умрингиз узоқ бўлсин, ўзларингизни эҳтиёт қилинглар!», — дейди Тожибар Азизова.
Мавзуга доир:
- «Мени тузукроқ жойга ўтказишсин» – Мирза Азизовнинг ўлими арафасида шифохонадан ёзган мактуби эълон қилинди
- «Менинг аҳволим сал оғирроқ, Тожибар опангизники анча яхши». Мирза Азизовнинг ковид-касалхонада даволанаётган пайтда юборган аудиоси тарқалди
- Мирза Азизов Зангиота шифохонасининг жонлантириш бўлимида 25 кун давомида коронавирус билан курашгани маълум бўлди
Изоҳ (0)