Наманганда Nexia ҳайдовчиси йўлни кесиб ўтаётган 5 ёшли қизчани уриб юборди. Жабрланувчи воқеа жойида вафот этди

Наманган вилоятининг Мингбулоқ туманида Nexia-2 русумли автомобиль ҳайдовчиси йўлни кесиб ўтаётган 5 ёшли қизчани уриб юборди, деб хабар беради вилояти ИИБ ахборот хизмати.

Маълум қилинишича, авария 20 апрель куни соат 18:30 ларда Жомашуй—Тегирмон—Навбаҳор йўлининг 4 километрида, «Кичик Жомашуй» маҳалласи ички йўлида содир бўлган. Nexia-2’ни бошқариб кетаётган ҳайдовчи ҳаракат хавфсизлигини таъминлай олмай, йўлни кесиб ўтаётган 5 ёшли пиёдани уриб юборган.

Оқибатда жабрланувчи тан жароҳати олиб, воқеа жойида вафот этган.

Ушбу ҳолат бўйича туман ИИБ ҳузуридаги Тергов бўлими томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.

Аввалроқ Наманганда MAN юк машинаси пиёдани уриб кетгани, Самарқандда Cobalt мактаб олдидаги пиёдалар йўлагидан ўтаётган 8 ёшли қизни уриб юборгани тўғрисида хабар берилганди.