Хусийлар Саудиянинг Абҳа шаҳридаги аэропортга учувчисиз қурилма ёрдамида ҳужум уюштирганини маълум қилди

«Ансор Аллоҳ» ҳаракати аъзолари (хусийлар) 20 апрель куни Саудия Арабистонининг жануби-ғарбида жойлашган Абҳа шаҳридаги халқаро аэропортга ҳужум қилди. Бу ҳақда исёнчи кучларнинг расмий вакили, бригада генерали Яҳё Сариага таяниб «ТАСС» хабар берди.

«Ҳаво кучлари ‘Касеф-2’ типидаги учувчисиз қурилма ёрдамида Абҳа халқаро аэропортига ҳужум уюштирди. Муҳим ҳарбий объектга зарба берилди», — деб ёзди Сариа ўзининг Twitter саҳифасида. У ушбу ҳужумнинг Ямандаги «тажовузларнинг кучайиши ва давом этаётган қамал»га берилган жавоб эканини таъкидлади.

Аввалроқ Al Arabia телеканали Ар-Риёдни бошқараётган араб коалицияси хусий исёнчилари томонидан бошқарилган, Саудия Арабистонининг Ҳамис-Мушайт шаҳрига йўналтирилган минали учувчисиз қурилмани тутиб олиб, йўқ қилгани ҳақида хабар берган эди.

Яманда 2014 йилдан буён ҳукумат ва хусийлар ўртасида қарама-қаршиликлар давом этмоқда. 2015 йилнинг март ойида Саудия Арабистони бошчилигидаги коалиция мамлакатга бостириб кириши билан бу зиддиятлар ўзининг энг фаол босқичига кўтарилди.

Беш йилдан ортиқ давом этаётган зиддият дунёдаги энг катта гуманитар инқирозга олиб келди. БМТ маълумотларига кўра, 24 миллиондан ортиқ яманлик — мамлакат аҳолисининг, тахминан, 80 фоизи — инсонпарварлик ёрдамига муҳтож, ички мухожирлар сони эса 3 миллиондан ошади.

Хусийлар мунтазам равишда ҳужумларни амалга оширмоқда, уларнинг асосий мақсади Саудия Арабистони ва унинг инфратузилмаси, шу жумладан, нефти бўлиб қолмоқда.

Маълумот учун, 2020 йилнинг ноябрь ойида «Ансар Аллоҳ» ҳаракати таркибига кирувчи яманлик исёнчилар вакили Саудия Арабистонининг Жидда шаҳрида Saudi Aramco нефть компаниясининг тақсимлаш станцияси ракета билан ўққа тутган эди. Саудия Арабистонида фаолият олиб борувчи чет эл компаниялари эҳтиёт бўлиши керак, чунки бундай операциялар ҳали давом этади, деган эди хусийлар.