Бугун,

  • USD 11095.31
  • RUB 173.84
  • EUR 10772.44

Фарғона вилоятининг Қўқон шаҳрида бозордаги тўловлар миқдори ва шартнома нархлари оширилганидан норози бўлган савдогар аёллар автомобиль йўлини тўсиб қўйди. Ҳодиса видеоси ижтимоий тармоқларда тарқалган.

«Дарё» мухбирининг аниқлик киритишича, воқеа 2021 йилнинг 13 апрель куни содир бўлган.

Қўқон шаҳридаги бозорлар ва савдо мажмуаларида бир марталик йиғимлар, ижара ва кўрсатиладиган хизматлар учун тўлов миқдорларининг оширилиши тадбиркорларнинг норозилигини келтириб чиқарган. Шу сабаб бир гуруҳ савдогар аёллар маҳаллий аҳоли томонидан «Янги бозор» деб номланувчи савдо мажмуаси олдидаги йўлни тўсиб қўйиш орқали норозилигини билдирган.

Фото: «Дарё»

«Қўқон савдо комплекси» ҳудудидаги дўконларда савдо қилувчи тадбиркорларнинг маълум қилишича, бозорда ижара тўловлари қарийб икки баробарга оширилган.

«Аввал бозоримизда бир метр квадрат жой учун ижара тўлови 22 минг сўм эди. 1 апрелдан бошлаб нарх икки баробарга ошиб кетди. Эндиликда бир метр квадрат учун 40 минг сўм қилиб нарх белгилашди. Нарх ошишига қарши эмасмиз, лекин бирданига шунча кўтариб юборишадими? Биз харажатларимизни қандай қоплаймиз? Сотаётган нарсаларимизнинг нархини икки баробарга оширсак, одамлар биздан ҳеч нарса олмай қўйишади», — дейди «Янги бозор» ҳудудида кийим-кечак сотувчи тадбиркорлардан бири.

Қайд этилишича, Қўқон шаҳар ҳокими Маъруфжон Усмонов воқеа жойида бўлиб, «Қўқон савдо комплекси» ҳудудида савдо қилувчи тадбиркорлар ҳамда йўлни тўсиб қўйган аёллар билан учрашган.

Тадбиркорларнинг мурожаатини ўрганган шаҳар ҳокими бозор ҳудудида савдо қилиш учун бир метр квадрат ҳисобида тўланадиган ижара ҳақи аввалги тариф бўйича ҳисобланишини маълум қилган. Бозор мутасаддиларига тадбиркорлар учун муносиб шароит яратиш бўйича кўрсатма берган. Шундан сўнг бозор олдида тўпланган тадбиркорлар тарқалган.

Ҳолат юзасидан вилоят ҳокимлигининг расмий муносабатида айтилишича, вилоятдаги бозорлар ва савдо комплексларида бир марталик йиғимлар, ижара тўлови ва кўрсатиладиган хизматлар қиймати пасайтирилган.

Маълум қилинишича, 2020 йилда коронавирус пандемияси даврида юзага келган иқтисодий беқарорликни ҳисобга олган ҳолда, бозорлар ва савдо комплексларида бир марталик йиғимлар, ижара тўлови ва кўрсатиладиган хизматлар қиймати миқдорлари оширилмаган.

Вилоят молия бош бошқармаси ва давлат солиқ бошқармасининг қўшма таклифини инобатга олган ҳолда 2021 йил 1 апрелдан Фарғона вилоятидаги бозорлар ва савдо комплексларида бир марталик йиғимлар, ижара тўлови ва кўрсатиладиган хизматлар қиймати миқдорларининг янги ставкаси тасдиқланган. Янги ставкалар бозорлар ва савдо комплексларда фаолият юритаётган тадбиркорлик субъектларининг эътирозларига сабаб бўлган.

«Шунга кўра, вилоят ҳокимлиги томонидан ушбу эътирозларни ўрганиш мақсадида махсус ишчи гуруҳ тузилиб, ҳолат тўлиқ ўрганиб чиқилди. Ўрганиш натижасига кўра, бозорлар ва савдо комплексларида бир марталик йиғимлар, ижара тўлови ва кўрсатиладиган хизматлар қиймати миқдорларини ошириш бўйича вилоят молия бош бошқармаси ва давлат солиқ бошқармаси томонидан киритилган қўшма таклифнинг асослантирилмаганлиги, йиғимлар, ижара тўловлари ва хизматлар миқдорлари учун белгиланган янги ставкалар тадбиркорлар учун мақбул эмаслиги ва уларнинг ҳақли эътирозларига сабаб бўлганлиги аниқланди.

Авазбек Ўринбоев.

Авазбек Ўринбоев.
Фото: «Дарё»

Ўрганиш натижаларидан келиб чиқиб, 2021 йил 1 апрелда тасдиқланган бозорлар ва савдо комплексларида бир марталик йиғимлар, ижара тўлови ва кўрсатиладиган хизматлар қиймати миқдорларига тегишли ўзгартиришлар киритиш, уларни кескин пасайтириш бўйича тегишли қарор қабул қилинди», — дейди Фарғона вилояти ҳокимининг биринчи ўринбосари Авазбек Ўринбоев.

Мазкур ҳодиса ортидан бозор ҳудудида савдо қилиш учун ижара тўловлари пасайтирилганини тадбиркорлар тасдиқлади. Маълум бўлишича, вилоят ҳокимининг тегишли қарори билан бир метр квадрат жой учун ижара тўлови 40 минг сўмдан 25 минг сўмга туширилган.

Мақола нашр этилиши арафасида вилоятнинг Риштон туманидаги деҳқон бозорида қишлоқ хўжалиги маҳсулотлари сотиш билан шуғулланувчи бир гуруҳ аёллар ҳам «Дарё»га мурожаат қилиб, бозорлардаги кунлик ижара тўловлари ошишидан норозилигини билдирди.

Маълум бўлишича, Риштон деҳқон бозори расталарида савдо қилиш учун бир метр жой нархи 5 минг сўмдан 8 минг сўмга оширилган.

«Илгари бир метр жой учун тўлов 5 минг сўм эди. Мен уч метр жойга бир кунда 15 минг сўм тўлардим. Энди бир метр жой 8 минг сўмга кўтарилди. Ҳозир савдо яхши эмас. Бир кунда жой учун шунча пул тўлашга қурбим етмайди. Солиқ тўловлари ҳам баланд. Уч нафар фарзандим бор, турмуш ўртоғим 2-гуруҳ ногирони. Битта фарзандим шартнома асосида ўқийди. Шароитимизни тушунтирсам, тушунишни исташмаяпти. Пулини тўлай олмасангиз, жойни бўшатиб қўйинг, дейишди. Бозордан чиқиб кетсам, қандай тирикчилик қиламан? Бориб ‘темир дафтар’га ёздиринг, дейишди. Шу ёшгача бировдан бир нарса сўрамаганман. Ўз меҳнатим билан кун кўришга ўрганганман. Бу ерда менга ўхшаган шароити оғир аёллар кўп. Шеригимнинг ҳам икки нафар фарзанди шартнома асосида ўқийди. Нарх масаласини қайта кўриб чиқишларини истаймиз», — дейди Риштон деҳқон бозорида савдо қилувчи Ҳурматой Шерматова.

Ҳолат юзасидан «Дарё» суриштируви давом этмоқда.

Изоҳ
Асосий янгиликлар
Дунё
Грета Тунберг тўртинчи бор тинчлик бўйича Нобел мукофотига номзод бўлди
Маҳаллий
Тошкент шаҳар Ободонлаштириш бош бошқармасига янги раҳбар тайинланди
Дунё
Совуқ урушни расман якунлаган Буш ва Ельцин, Францияга қочиб кетган машҳур режиссёр — Роман Полански ва “Буюк голланд тошқини”. Кун хронологиясида 1 февраль