АҚШ Афғонистондан ўз қўшинларини 11 сентябргача олиб чиқади. Унинг кетидан Британия ҳам ҳарбийларини олиб кетади

АҚШ Афғонистондан ўз ҳарбийларини олиб чиқиш муддатини қайта кўриб чиқди, деб хабар берди президент маъмуриятининг вакили. Унинг сўзларига кўра, америкалик ҳарбийлар минтақани 11 сентябргача тарк этади. 2020 йилнинг охирига келиб Афғонистонда Американинг 8,6 минг ҳарбий хизматчиси қолган эди.

«Қолган қўшинларни тартибли равишда 1 майга қадар олиб чиқишни бошлаймиз ва 11 сентябрь, Америка қўшинлари Афғонистонга кирганининг 20 йиллиги санасига қадар барча ҳарбийларни мамлакатдан олиб чиқишни режалаштиряпмиз», — деди президент маъмуриятининг вакили журналистларга.

Унинг қўшимча қилишича, қўшинлар ҳудуддан олиб чиқилаётганда ҳужумга учраган тақдирда, АҚШ ҳарбийлари «кучли жавоб» қайтаради. «Биз (минтақада) терроризм хавфини кузатишни тўхтатмаймиз... Афғонистон террорчиларнинг АҚШга қарши ҳужумларини тайёрлаши мумкин бўлган базасига айланишига йўл қўймаслик учун тинимсиз ишлашда давом этамиз», — деб таъкидлади у.

Маълумот учун, 2020 йилнинг февраль ойида АҚШ ва «Толибон» ўртасида тинчлик шартномаси имзоланган эди. Шартнома АҚШ ҳарбийларини 2021 йилнинг 1 майига қадар Афғонистондан босқичма-босқич олиб чиқиш, маҳбусларни озод қилиш ва янги ҳукумат тузишни кўзда тутган.

Оқ уйнинг янги маъмурияти эса ҳарбийларни олиб чиқиш муддатини қайта кўриб чиқиш режасини эълон қилди.

«Ҳарбийларни у ерда узоқ ушлаб турмоқчи эмасман... У ердан кетамиз, лекин қачонлиги номаълум», — деди Байден. АҚШ ҳарбийлари Афғонистонда кейинги йилгача қолиши мумкинми, деган саволга жавобан Байден «бундай бўлишини тасаввур қила олмаслиги»ни айтди.

The Times газетасининг ёзишича, Буюк Британия ҳам деярли барча қўшинларини Афғонистон ҳудудидан олиб чиқишни режалаштиряпти.

Маълумотларга кўра, бугунги кунда Афғонистонда 750 минг британиялик ҳарбий бор. Шу билан бирга, Буюк Британия армияси америкаликларнинг базалари ва инфратузилмасидан фойдаланиб келгани сабабли АҚШ қўшинларининг олиб чиқилганидан кейин британияликларнинг қийинчиликларга дуч келиши эҳтимоли бор. Шунингдек, Буюк Британия ҳарбийлари маҳаллий аскарлар билан машғулот ўтказадиган Кобул академиясининг назорати ҳам Афғонистон ҳукуматига топширилиши мумкин.

Байден маъмуриятининг бундай қарорига жавобан, «Толибон» Афғонистондаги чет эл ҳарбийларига қарши ҳужумларни қайта бошлаш билан таҳдид қилди ва уларнинг барчаси белгиланган муддатда Афғонистонни тарк этмаса, «толиблар» яна «ватанини озод қилиш учун, жиҳодни ва чет эл ҳарбийларига қарши қуролли курашларни давом эттиришга мажбур» бўлишини таъкидлади. Шунингдек, бу талаблар бажарилмагунча, «Толибон» делегацияси ҳеч қандай конференцияда иштирок этмаслигини маълум қилди.