Апрель охирида Sotheby’s аукцион уйи LMP1 классига кирувчи Porsche 919 Hybrid прототипининг онлайн-савдоларини ўтказади. Бу ҳақиқий автомобиль эмас, балки реклама мақсадларида яратилган макет ҳисобланади. Бироқ шунга қарамай, унинг нархи 80-120 минг евро атрофида бўлиши кутилмоқда. Бу пулга ҳақиқий Porsche Cayenne харид қилиш мумкин, деб ёзади Motor.
Лот изоҳида ёзилишича, 2014 йилда Porsche компанияси 919 Hybrid’нинг 13 та макетини яратган. Уларнинг барчаси шиша пластик панеллар илинган пўлат каркас кўринишида бўлиб, пойга машинасининг асл нусхаси ҳисобланади. Ушбу нусхалардан реклама тадбирларида фойдаланилган, жумладан, Porsche шериклари томонидан: станок ишлаб чиқарувчи DMG Моri холдинги ва подшипниклар ишлаб чиқарувчи Schaeffler Technologies компанияси.
Компания макетларни яратишда автоматлаштирилган лойиҳалаштириш тизимидан оригинал чизмаларни олган, Porsche Intelligent Performance ливреясини туширишни Becker Design студиясига ишониб топширган.
Porsche тарихида 919 гибридига алоҳида эътибор қаратилади. Биринчидан, у уч маротаба «Ле-Манда 24 соат» пойгалари ғолиби бўлган: 2015-, 2016- ва 2017 йиллар. Иккинчидан, машина Нюрбургрингда мутлақ рекордни ўрнатган — 5 дақиқаю 19,546 сония. 919’нинг ютуқлари ноёб коллекцион буюмлар билан ҳам белгиланган. Масалан, сўнгги шиналар жамланмаси прототипи 200 та винил пластинкада чиқарилган. Уларнинг ҳар бирига Porsche’нинг «Ле-Манда 24 соат»да иштирокига оид 24 та воқеа ёзилган ва хайрия аукциони орқали сотилган.
Йилдан йилган Porsche 919 Hybrid конструкцияси бироз ўзгариб борган. Бироқ барча асосий учта вариантни ноодатий гибрид конструкция бирлаштириб туради: иккита энергия рекуперацияси тизимига эга 2,0 литли V4 турбомотори. Tурбомотор 500 от кучини тақдим этишга қодир. Бензо-электромотор эса модификациясидан келиб чиқиб 800—950 от кучини тақдим эта олади.
Моделнинг тўртинчи итерацияси ҳам мавжуд — 919 Hybrid Evo — у анча экстремал ва LMP1 чеклов класслари ҳисобга олинмаган ҳолда яратилган. Бу каби прототипга 720 от кучини тақдим этувчи 2,0 литрли V4 двигатель ва 439 от кучига эга электромотор ўрнатилган.
Аввалроқ колумбиялик наркобарон Пабло Эскобарга тегишли бўлган Porsche сотувга қўйилгани, Австралияда 63 йиллик занг босган ноёб Porsche янги 911 нархида сотилгани тўғрисида хабар берилганди.
Изоҳ (0)