Наманганда 1 апрелда кузатилган кучли шамол Тўрақўрғон тумани марказида жойлашган «Арк» мажмуасининг томини учириб юборди. Бу ҳақда «Дарё» мухбири Азизбек Абдувалиев хабар бермоқда.
2014 йилда қурилган ушбу уч қаватли мажмуа аслида меҳмонхона учун мўлжалланган. Аввалига ошхона сифатида фойдаланилган, 2016 йилдан эса «Комилаой шифо» хусусий шифохонаси фаолият олиб бормоқда.
— Ҳодиса чамаси соат 15:10 ларда рўй берди. Учинчи қават дам олиш майдонига мўлжаллангани учун томи металл конструкция ва тунука материалларидан фойдаланиб, ўстирма айвон, яъни «навес» тарзида қурилганди. Атроф очиқ бўлгани учун қаттиқ шамол уни учириб юборди, — дейди мажмуа иш бошқарувчиси Тўлқинжон Болтабоев.
Бу пайт шифохонда 12 нафар бемор, 9 нафар ходим бўлган. Ўлчами 400 квадрат метрга тенг том қулаши оқибатида ҳеч кимга шикаст етмаган.
— Вилоят Фавқулодда вазиятлар бошқармаси бошлиғи, генерал майор Қосимали Аҳмедов бошчилигида гуруҳ дарров воқеа жойига етиб келди. Биринчи галда мажмуа электр тармоғидан узилди. Бино ичидаги фуқаролар зудлик билан ташқарига олиб чиқилди. ФВБ ходимлари махсус асбоблар ёрдамида томнинг кўчиб тушган металл ва тунукаларини кесиб, йўлни очишди, — дейди туман ФВБ бошлиғи, подполковник Фозилжон Хўжамбердиев.
Мажмуа эгаси тадбиркор Салоҳиддин Нажмиддинов томонидан бугуннинг ўзида томни қайта ўрнатиш бўйича ишлар бошлаб юборилди. Шифохона яна бир ҳафтадан сўнг фаолиятини давом эттириши кутилмоқда.
Маълумот учун, кеча Тўрақўрғон туманида кузатилган шамол тезлиги секундига 15—17 метрга тенг бўлгани айтилмоқда.
Изоҳ (0)