Самарқанд вилояти Экология ва атроф-муҳитни муҳофаза қилиш бошқармаси ахборот хизмати раҳбари Шерали Искандаров 27 март куни автомобиль йўлида шер боласи топиб олингани айтилган хабарга расмий муносабат билдирди. Бу ҳақда «Замон» информацион дастури хабар қилди.
Маълум қилинишича, видеода кўрсатилган шер боласи, айтилаётганидек, топиб олингани йўқ, балки ушлаб қолинган. Самарқанд вилояти Экология ва атроф-муҳитни муҳофаза қилиш ҳамда вилоят Ички ишлар бошқармалари ҳамкорлигида ўтказилаётган рейд давомида Қашқадарёдан Андижонга ҳаракатланаётган автомашина текширилганда, унда шер боласи олиб кетилаётгани аниқланган.
«Қашқадарёлик ва андижонлик икки шахс Nexia-2 русумли автоулов юкхонасида тахминан 1,5 ёшлик Африка шер боласини Андижонга олиб кетилаётгани аниқланди. Ҳайвон ИИББ қошидаги Кинология бўлимига олиб борилган.
Ҳайдовчи вазиятдан қутулиш учун шер боласи ётган юкхонани ҳаракат вақтида очиб, ҳайвонни қочириб юбормоқчи бўлган. ИИО ходимлари машинани зудлик билан тўхтатиб, шерни қайта ушлаб, машинага солиб, олиб кетилган», – дейди Шерали Искандаров.
Шер боласининг бир оёғи лат егани аниқланган ва ҳозирда даво чоралари кўрилмоқда. Муолажалардан сўнг шер боласи 29 март куни Тошкент ҳайвонот боғига топширилади.
Шерни эгаси сифатида ушланган шахсларда ушбу ҳайвонни боқиш ва парваришлаш учун ҳеч қандай ҳужжати йўқлиги аниқланган. Ҳозирда терговга қадар суриштирув ишлари олиб борилмоқда.
Бундан аввал Россияда эгасидан қочиб кетган айиқ кўчадаги йўловчиларни қувлашга тушгани, Татаристонда цирк томошаси пайтида филлар уришиб кетгани ҳамда Юнусободда дарахтга осилиб қолган чўл бургути қутқарилгани ҳақида хабар берилганди.
Изоҳ (0)