Мода олами тинимсиз ўзгаришда бўлиб, у билан ҳамнафас бўлишнинг ўзи ҳам бир санъат. Аммо баъзи тенденциялар алоҳида ажралиб туришга сабаб бўлади. Кеча урфда бўлса ҳам бугун эскирганлиги туфайли ташқи кўринишга путур етказаётган бўлиши мумкин.
Ингичка кўзойнаклар
Ингичка ва кичик ҳажмдаги кўзойнаклар қанчалар тез урфга кирган бўлса, ундан чиқиши ҳам шунча осон бўлди. Ҳозирда кенг ҳажмдаги катта кўзойнаклардан фойдаланиш мумкин.
Бомбер-курткалар
Сўнгги бир неча йил ичида бомбер-курткалар деярли ҳамманинг гардеробини тўлдирган эди. Аммо 2020—2021 йилларда тўғри бичимли ёки белбоғли пальтолар урфда.
Калта жинси шимлар
Клёш калта шимлар, асосан, бўйи баланд қизлар учун жуда мос келади. Бошқаларнинг эса бўйини аксинча янада паст ҳамда семиз қилиб кўрсатиши мумкин. Шунинг учун ҳам дизайнерлар текис ва одатий узунликдаги шимлар танлашни тавсия этади.
Тасмали сумка ёки рюкзаклар
Вақт ўтиши билан барча нарса ўзгариши, шубҳасиз. Ҳаттоки урфга қарамай ҳамиша ичи керакли буюмларга тўла бўлган сумкалар ҳам. Ҳозирда кенг ҳажмли, қопсимон, тутқичлари занжирсимон сумкалар ёрдамида ажойиб образ яратиш мумкин.
Пластик аксессуар ва пойабзал
Бу каби пойабзаллар фойдали бўлмагани билан бирга, образга ҳам путур етказади. Шунинг учун ноодатийликни хуш кўрувчилар эҳтиёткорлик билан кийим танлаши керак.
Ортиқча логотиплар
Машҳур брендлар, албатта, ўзининг махсус логотипига эга. Аммо ҳар бир либосда уларни акс этиши ҳам бир қанча ноқулайликлар келтириб чиқаради. Либос танлашда имкон қадар бренди яширин ва ҳеч қандай ишлаб чиқарувчига ишора қилмайдиганларига мурожаат қилиш керак.
Денгиз жисмлари каби безаклар
Ушбу услубдаги тақинчоқлар 2-3 йил аввал урфда эди. Аммо дизайнерлар марваридларга ҳамиша образга қўшимча кўрк бағишловчи тақинчоқ сифатида қарайди. Натижада чиғаноқли ёки шу каби тақинчоқлар ўз-ўзидан четга чиқди.
Қоплон нусхали юбка
Умуман олганда, қоплон нусхали либослар анча аввал урфдан қолган, шу жумладан, юбкалар ҳам. Унинг ўрнига бироз нафис, сипо ёки ҳеч қандай нақшсиз кенг юбкалар образни бойитишда ёрдам беради.
Икки хил зирак
Бир вақтлар барчанинг кўнглидан жой олган икки хил кўринишдаги зираклар тез орада аёлларни зериктирди.
Ҳуди-либослар
Ҳуди-либослар қулайлиги билангина ҳозиргача кийилишда давом этмоқда. Аслида улар қоматни семиз қилиб кўрсатиши билан ташқи кўринишга путур етказади.
Қоматни тортиб турувчи кўйлаклар
Бу каби либослар ҳаво ўтказадиган табиий матодан тикилмагани билан бирга, ўта торлиги билан ҳам танани зўриқтиради. Инсон борган сари ўзи учун қулайлик излаётган вақтда қоматни тортиб турувчи либослар гардеробда қолмаслиги табиий.