Тишларни соғлом ва бақувват сақлаш учун уларни кунига икки марта тозалаш, тиш ипидан фойдаланиш ва йилига икки марта стоматолог кўригидан ўтиш жуда муҳимдир. Бу борада тишларни қандай паста билан ювишнинг ҳам аҳамияти борми? Шифокорлар фикрича, тиш пасталаридаги баъзи ингредиентлар тишларга зарар етказиши ва стоматолог билан учрашувни тезлаштириши мумкин. Тиш пастаси таркибига кўра қандайларидан фойдаланиш ва қайсиларидан воз кечиш ҳақида гаплашамиз.
Ёдингизда бўлсинки, мақола фақат маълумот учун мўлжалланган, ундаги фикрлардан ташхис қўйиш ёки даволашда фойдаланиш мумкин эмас!
Фтор
Тиш пастасининг энг кенг тарқалган таркибий қисмидир. Маълумки, кариеснинг олдини олиш ва тиш эмалини мустаҳкамлашдаги асосий бирикма фторидлар ҳисобланади. Деярли барча замонавий тиш пасталарида фтор ёки фторли натрий қўлланилади.
Ушбу таркибий қисм қанчалик хавфсиз?
Бу соғлом тишларга эга бўлганлар учун фойдали, албатта. Аммо тишларда кариес аллақачон бошланган бўлса, тиш пастаси таркибидаги фтор касалликнинг тезроқ ривожланишига ёрдам беради. Агар тишларингизда шундай муаммолар бўлса, фторсиз тиш пастасидан фойдаланганингиз маъқул.
Калий нитрат
Таркибида калий нитрат бўлган тиш пасталари юқори таъсирчан тишларга эга одамлар учун тавсия этилади: калий нитрат эмал сезгирлигини камайтиради. Бундай натижага эришиш учун тиш пастасидан бир неча ҳафта, ҳатто ойлаб фойдаланиш лозим.
Ушбу таркибий қисм қанчалик хавфсиз?
2012 йилдаги кичик тадқиқотлар калий нитратининг эмал сезгирлигини камайтириш самарадорлигини тасдиқлаган. Аммо сизда бу каби муаммо бўлмаса, бундай пастани ишлатманг: калийсиз тиш пасталарининг аксарияти тишларни кариесдан калийли пастага нисбатан яхшироқ ҳимоя қилади.
Кальций карбонат
Кальций карбонат оқартирувчи тиш пасталарининг асосий таркибий қисмларидан биридир. Япониялик мутахассислар томонидан 2019 йилда ўтказилган кичик тадқиқот шуни тасдиқладики, таркибида кальций карбонат бўлган пасталар тиш эмалидаги доғларни камайтиради.
Ушбу таркибий қисм қанчалик хавфсиз?
Кальций карбонат чархлаш хусусиятига эга, шунинг учун у тиш эмали мустаҳкам бўлганларгагина тавсия қилинади. Тишингиз сезувчан бўлмаса ҳам, бундай пасталардан эҳтиёткорлик билан фойдаланган маъқул. Бундай ҳолатларда қаттиқ тукли тиш чўткаларини ишлатманг.
Лаурилсулфат натрий
Ушбу ингредиент, асосан, кўпик ҳосил қилиб, тиш пастасидан кўпроқ фойдаланиш имконини беради. Аммо бу қанчалик хавфсиз?
Афсуски, таркибида лаурилсулфат натрий бўлган тиш пасталарини ишлатиш натижасида оғиз яраси, қизариш, шишиш ва юмшоқ тўқималар шикастланиши каби ножўя таъсирлар кузатилиши мумкин.
Фаоллашган углерод
Тиш пасталарини оқартиришда ишлатиладиган яна бир асосий таркибий қисм. Афсуски, 2017 йилда ўтказилган тадқиқотлар натижаларига кўра, таркибида кўмир бўлган тиш пастларининг хавфсизлиги ва самарадорлигини қўллаб-қувватлаш учун етарли клиник маълумотлар аниқланмаган. Шундай экан, қордек оппоқ табассум учун хавфсизроқ воситани танлаган маъқул.