Сиёсат оламида яхши маълум, аммо серфарзанд экани ҳақида ҳамма ҳам маълумотга эга бўлмаган давлат раҳбарлари ҳақида маълумот бериб ўтамиз.
Александр Лукашенко — Беларусь президенти
Александр Лукашенко 1994 йил 20 июлда Беларусь президенти бўлган. 1975 йилда Галина Родионовна билан турмуш қурган сиёсатчининг икки ўғил фарзанди бор. Президент бўлганидан кейин Лукашенко фарзандларининг онаси билан ажрашмаган ҳолда алоҳида яшай бошлаган. 2004 йилда учинчи фарзанди дунёга келган, аммо Лукашенко унинг онаси ким эканини сир тутган. ОАВ боланинг онаси, президентнинг собиқ, шахсий шифокори Ирина Абельская деб маълумот тарқатган. Давлат раҳбари бир неча марта бошқа давлатларга расмий ташрифи давомида кенжа қизи Николаяни ўзи билан бирга олиб кетган. Унинг 7 нафар набираси бор.
Филипп — Бельгия қироли
Бельгия қироли Филипп Леопольд Людовик Мария 2013 йилда тахтга ўтирган. У уйда таълим олмасдан оддий мактабга қатнаб ўқиган биринчи меросхўр шаҳзода бўлган. Стэнфорд университетида сиёсатшунослик бўйича магистрлик даражасини қўлга киритган. Матильда д’Удекем д’Акозга уйланган Филиппнинг 4 нафар фарзанди бор. Бельгияда меросхўрлик жинсга боғлиқ эмас, шу сабаб ҳам унинг биринчи қизи 18 яшар Елизавета Тереза Мария Елена тахтга биринчи даъвогар ҳисобланади. Бельгия қиролининг ўғли Габриэль Бодуэн Карл Мария 16, учинчи фарзанди Эммануэль Леопольд Гиём Франсуа Мария 14 ҳамда кенжа фарзанди 11 ёшда.
Рамзан Қодиров — Чеченистон Республикаси раҳбари
Чеченистоннинг биринчи президенти Аҳмад Қодировнинг ўғли 2007 йил 5 апрелдан буён республикага раҳбарлик қилади. Рамзан ва унинг рафиқаси Меднининг 12 нафар фарзанди (улардан иккитаси асраб олинган) бор. Ўғли Аҳмад 14, Зелимхон 13, Адам 12 ва кенжа ўғли Абдуллоҳ 3 ёшда. Катта қизи Айшат 21, Карина 20, Хеди 17, Табарик 15, шунингдек, Айшура 7, Эйшат эса 5 ёшда. Қизи Айшат 2016 йилдан буён Firdaws мода уйини бошқаради ва Чеченистон давлат университетининг иқтисодиёт факультетида ўқийди. У 2017 йилда турмушга чиққан.
Алмазбек Атамбаев — Қирғизистон собиқ президенти
Қирғизистонни 2011—2017 йилларда бошқарган Атамбаев 6 нафар фарзанднинг отаси. Биринчи турмушидан Сейитбек исмли ўғли ва Диана ҳамда Динара исмли эгизак қизи бор. 1988 йилда Раиса Минахмедовнага уйланган, рафиқаси Алия ва Қодир исмли фарзандларни дунёга келтирган. Рассомлик касбини танлаган 23 яшар Алия Instagram’да блог юритади ва мамлакатда аёллар ҳуқуқини қўллаб-қувватлайди.
Керсти Кальюлайд — Эстония президенти
50 ёшли Кальюлайд Эстонияни 2016 йилдан буён бошқаради. Унинг 4 нафар: биринчи турмушидан бир ўғил ва бир қиз, иккинчи турмушидан эса икки ўғил фарзанди бор.
Эмомали Раҳмон — Тожикистон президенти
1994 йилдан бери президентлик қилаётган Эмомали Раҳмон Азизмо Асадуллаева билан турмуш қурган. Жуфтликнинг 9 нафар фарзанди бор: энг каттаси 45, энг кичиги эса 21 ёшда. Уларнинг деярли барчаси оила қуришга улгурган. Ўрта Осиёнинг энг обрўли аёллари ўнталигидан ўрин олган иккинчи қизи Озода Раҳмон 2016 йилда мамлакат парламентининг юқори палатаси сенатори бўлган.
Пётр Порошенко — Украина собиқ президенти
Украинада 2014 йилдан-2019 йилгача раҳбарлик қилган Порошенко президент бўлгунига қадар кўп тармоқли холдингни бошқарган. Пётр ва рафиқаси Маринанинг 4 нафар фарзанди бор. Катта ўғли Алексей ўзи сингари сиёсатни танлаган ва 2014 йилда халқ депутати бўлган. Эгизак қизлари Евгения ва Александра 2000 йил, кенжа ўғли Михаил эса 2001 йилда дунёга келган.
Дональд Трамп — АҚШнинг собиқ президенти
АҚШнинг 45 президенти уч марта турмуш қурган. Биринчи рафиқаси Ивана Зелничкова уч фарзанд: кичик Дональд, Иванка ва Эрикни, иккинчи турмуш ўртоғи Марла Мейплз эса Тиффани исмли қизни дунёга келтирган. 2005 йилда турмуш қурган Меланядан эса 14 ёшли Беррон Уильям исмли ўғли бор. АҚШ собиқ президенти 8 нафар набиранинг бобоси.
Елизавета II — Буюк Британия қироличаси
93 яшар қиролича 1952 йил 6 февралда тахтга ўтирган. Елизавета II ва шаҳзода Филиппнинг 71 яшар тахт вориси шаҳзода Чарльздан ташқари, яна икки нафар ўғли ва бир нафар қизи: шаҳзода Андрю, шаҳзода Эдвард, шунингдек, малика Анна бор. Анна «қироллик маликаси» мақомига эгалик қилади.