Қирғизистон пойтахти Бишкек шаҳар мэрияси коронавирус билан касалланиш сони кўпайгани сабабли ҳар йили анъанавий тарзда нишонланадиган Наврўз байрамини бекор қилиш ҳақида қарор қабул қилди. Бу ҳақда Kloop хабар берди.
«COVID-19 коронавирус инфекцияси тарқалишининг олдини олиш мақсадида Бишкек шаҳар мэрияси қошидаги шаҳар эпидемияга қарши курашиш фавқулодда комиссияси Бишкек шаҳрида Наврўз байрамига бағишланган оммавий тадбирларни ўтказишни бекор қилиш ҳақида қарор қабул қилди», — деб хабар берди ҳокимлик.
Қирғизистонда коронавируснинг биринчи ҳолати аниқланганидан бир йил ўтгач, 18 март куни мамлакатда вирус билан касалланганлар сони 87 143 нафарга етди. 17 март давомида янги ҳолатлар сони яна 98 тага кўпайган.
Ҳозирда Қирғизистон вакцинацияга тайёргарлик кўрмоқда. Соғлиқни сақлаш вазирлиги маълумотларига кўра, одамларни эмлаш март ойининг охири ёки апрель ойининг бошида бошланади. Қирғизистонга бир вақтнинг ўзида бир неча хил вакцина, шу жумладан, Россия ва Хитой вакциналари ҳам келади.
Шунингдек, Қозоғистон пойтахти Нур-Султонда ҳам 18 мартдан чеклов ва карантин чоралари кучайтирилиши, 21 март куни эса пойтахтда локдаун эълон қилиниши ҳақида хабар берилган эди.
Изоҳ (0)