Президент Шавкат Мирзиёев 18 март куни Тошкент вилоятига амалга оширган ташрифи давомида ОАВ вакиллари билан учрашиб, суҳбатлашди. Бу ҳақда «Дарё» мухбири Миролим Исажонов хабар бермоқда.

«Сиз журналистлар билан бугун, эрта Тошкент вилоятининг айрим ҳудудларида бирга юрамиз, мажлис ўтказамиз, одамлар билан учрашамиз. Мақсадимиз – Тошкент вилоятининг мутлақо бошқача йўл харитасини тузиш. Тошкент вилоятида ‘туманбай’ ишлаш бўйича тажриба ўтказамиз. Эртага сайланадиган ҳоким фақат ва фақат 1 минг 48 та маҳалла дарди билан яшаш тизими бўйича ишлайди», – деди Шавкат Мирзиёев.

Давлат раҳбари журналистларга юзланаркан, уларга ишонишини яна бир бор таъкидлади.

«Бир йил олдин сизлар шундай эдингларми? Ҳаммамиз шундай эдикми? Ҳамма танқид қилишни билади, лекин уч йил олдин ОАВга муносабат қандай эди? Мен Наманганда айтган эдим, сизларни орқаларингда Президент турибди. Яна қайтараман, мен сизларга ишонаман, албатта, адолатли ҳақиқатни халқимизга етказиб берасизлар.

Лекин биз кўп нарсани биргаликда ўрганяпмиз. Сизларнинг ҳам савияларинг ошяпти, халқимизнинг ҳам савияси, ишончи ошиб боряпти. Бирор масалани адолатли кўтариб чиқиш учун сизларнинг ҳам билим, ҳам илмларинг, тажрибаларинг, таҳлил қилиш қобилиятларинг мунтазам ўсиб бориши керак. Ҳар бир айтилаётган гапнинг борини, ростини етказиш керак. 2 йил олдин қанақа эди, 20 йил аввал қандай эди?», – деди Президент.