Наманган вилоятининг Мингбулоқ туманида имтиёзли кредитни ноқонуний ўзлаштирган шахсларга нисбатан жиноят иши қўзғатилди, деб хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, департаментнинг Мингбулоқ туман бўлими томонидан ўтказилган терговга қадар текширувда «Г» МЧЖ раҳбари И.Д. ва бошқалар олдиндан тил бириктириб, банк муассасасидан автомобилларга техник ва маиший хизмат кўрсатиш марказини ташкил этиш учун ажратилган 1 миллиард сўм имтиёзли кредит маблағини сохта ҳужжатларни тузиш орқали нақдлаштириб, ўзлаштириш йўли билан талон-торож қилгани аниқланган.
Ҳолат юзасидан И.Д. ва бошқаларга нисбатан Жиноят кодексининг 167-моддаси (талон-торож қилиш) ва 228-моддаси (ҳужжатларни қалбакилаштириш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент вилоятининг Пискент туманида 1,3 миллиард сўмлик имтиёзли кредитни талон-торож қилган фермер хўжалиги раҳбарига, Наманганда «Ҳар бир оила тадбиркор» дастури доирасида 155 миллион сўмлик кредит маблағларини талон-торож қилган тадбиркорга жиноят иши қўзғатилгани, Зангиотада «Ёшлар — келажагимиз» жамғармаси раҳбарлари катта суммадаги кредит маблағларини талон-торож қилгани аниқлангани ҳақида хабар берилган эди.
Изоҳ (0)