Чехия Москвадаги парадга борадиган Словакия етакчисига ҳаво ҳудудини очди

Чехия Словакия бош вазири Роберт Фицонинг Москвадаги 9 май парадида иштирок этиши учун унга ўз ҳаво ҳудудидан фойдаланишга рухсат берди. Бу ҳақда Deutsche Welle хабар берди.

“Словакия томони парвозга рухсат олиш учун стандарт сўров юборди ва у кечиктирилмасдан берилди”, деди Чехия Ташқи ишлар вазирлиги матбуот котиби Адам Чёргё.

У рухсатнома қанча муддатга берилганига аниқлик киритмади. Аввалроқ Эстония, Литва ва Латвия ўз ҳаво ҳудудларини Словакия бош вазири учун ёпишини маълум қилганди. Бунга жавобан Фицо Россияга ташриф буюриш учун муқобил йўл топишига ваъда берган. Чехия Россия билан умумий чегарага эга эмас, шунинг учун Фицога Россияга бориш учун бошқа давлатлардан, масалан, Германиядан ҳам рухсат олиши керак бўлади.

Зеленский Фицо билан муносабатларни яхшиламоқчи

Украина президенти Владимир Зеленский 2 май куни Роберт Фицо билан телефон орқали мулоқот қилди.

“Мамлакатларимиз ўртасида мустаҳкам муносабатлар бўлиши керак ва биз бундан манфаатдормиз. Словакия Украинанинг Европа Иттифоқига аъзолигини қўллаб-қувватлайди ва аъзо бўлиш бўйича ўз тажрибасини баҳам кўришга тайёр”, деди Украина раҳбари.

Зеленский Словакия бош вазирини Киевга таклиф қилди. Ўзи эса Братиславага ташриф буюриш таклифи учун миннатдорлик билдирди.

“Яқин келажакда шахсан учрашиш имкониятини ҳам муҳокама қилдик. Жамоаларимиз график устида ишлайди”, деди Украина давлати раҳбари.

Ҳарбий техникасиз парад

9 май куни Москвадаги анъанавий парад узоқ вақтдан бери биринчи марта ҳарбий техникаларсиз ўтказилади. Россия Мудофаа вазирлиги буни “тезкор вазият”, Кремль эса “террорчилик таҳдиди” дея изоҳлади. Тадбир арафасида мобил алоқа ҳам чекланади. Ушбу чекловлар нафақат шаҳар марказида, балки бутун Москва ҳалқа йўли ҳудуди бўйлаб жорий этилади.

2025 йилда Москвадаги 9 май парадида 27 та давлат раҳбари, жумладан, Хитой, Беларусь, Куба, Венесуэла, Словакия ва Сербия етакчилари иштирок этган эди. Ўшанда Латвия, Эстония, Литва ҳукуматлари Роберт Фицо ва Сербия президенти Александр Вучичнинг самолётларини ўз ҳудудидан ўтказишни рад этган.

Рига бу тақиқни “парвоз мақсадининг сиёсий нозиклиги” билан изоҳлаган бўлса, Вильнюс “техник ва дипломатик нозиклик”ни сабаб қилиб кўрсатган эди. Шунингдек, Фицонинг Польша ҳаво ҳудуди орқали учиб ўтиши ҳам тақиқланган эди.