Наманган вилояти ҳокими Шавкат Абдураззоқов Қирғизистон ҳукуматининг Жалолобод вилоятидаги ваколатли вакили Абдусаттор Сиргабаев билан видеомулоқотда бўлди. Бу ҳақда «Дарё» мухбири Азизбек Абдувалиев хабар бермоқда.

Фото: Наманган вилояти ҳокимлиги ахборот хизмати

Мулоқот давомида икки вилоят ўртасидаги ҳамкорликнинг бугунги ҳолати ва келгусидаги истиқболлари муҳокама қилинди. Ўзаро алоқаларни мустаҳкамлашга қаратилган «Йўл харитаси» кўриб чиқилди.

Шавкат Абдураззоқов қишлоқ хўжалиги, чорвачилик, саноат ва текстиль соҳаларидаги ҳамкорликка алоҳида урғу берди. 2021 йил март ойида, Наврўз байрами кунлари Наманганда икки вилоят тадбиркорларининг бизнес-форумини ўтказишни таклиф қилди.

— Наманганда Наврўз  кунлари 6 тонналик сумалак тайёрланади, улоқ-кўпкари ўтказилади. Сиз бошчилигингиздаги делегацияни азиз меҳмонларимиз қатори кутиб олишга тайёрмиз. Байрамни биргаликда нишонлаймиз, — деди Шавкат Абдураззоқов.

Фото: Наманган вилояти ҳокимлиги ахборот хизмати

Ушбу таклиф ваколатли вакил томонидан мамнуният билан қабул қилинди.

Ўз навбатида, Абдусаттор Сиргабаев «Наманган—Жалолобод» йўналишида транспорт қатновини йўлга қўйиш, кўмир ишлаб чиқариш бўйича қўшма корхона очиш, Жалолобод вилоятининг Сафед-Булон, Саричелак, Арслонбоб каби туристик манзилларига наманганлик сайёҳларни жалб этиш бўйича таклифларини илгари сурди.

Фото: Наманган вилояти ҳокимлиги ахборот хизмати

Икки вилоят раҳбарлари Қирғизистон президенти Садир Жапаровнинг Ўзбекистонга бўлажак ташрифи арафасида ўзаро алоқаларнинг барча жиҳатларини яна бир бор кўриб чиқишга келишиб олди.