Бир неча йиллар давомида олимлар Марсда ҳаёт бор ёки йўқлигини аниқлашга ҳаракат қилмоқда. 2021 йил 19 февралга ўтар кечаси инсоният айнан шу мақсадга бир қадам яқинлашди: NASA’нинг Perseverance марсоходи Қизил сайёра юзасига муваффақиятли қўнди. Марсга саёҳат қилиш ҳали ҳам орзу бўлиб қолмоқда, аммо сайёранинг ажойиб тасвирлари Ерда ҳам шунга ўхшаш ландшафтлар борлигини ёдга солади. Баъзан ўзга сайёрада бўлиб қолиш учун бошқа қитъага чипта сотиб олишнинг ўзи кифоя қилади.
Вади-Рам, Иордания
Води-Рам (Ой водийси деб ҳам аталади) чўлини «Ердаги Марс» дейиш учун ҳамма нарса бор. Қизил қумтошлардан тортиб тарихий кратерларгача мавжуд бўлган бу ажойиб жойда ўзингизни Қизил сайёрага келиб қолгандай ҳис қиласиз, энг муҳими эса сизга ҳеч қандай ҳарорат ўзгариши ёки космик нурланиш зарар етказмайди.
Сан Педро де Атакама, Чили
Агар сиз учун Марснинг ноодатий манзараси энг муҳим хусусият бўлса, унда Чилининг Сан Педро де Атакама қишлоғини саёҳатлар рўйхатига қўшиб қўйинг. Тузли текисликлар, вулқонлар, гейзерлар ва иссиқ булоқлар — маҳаллий ландшафт Қизил сайёра манзараси билан бемалол рақобатлаша олади.
Моаб, АҚШ
Марсга ўхшаш жойлар рўйхати Америка Моабисиз тўлиқ бўлмайди. Юта штатининг шарқида жойлашган шаҳар, Аrches миллий боғидаги қизил тош шаклларини ва Каньонлендларни ўрганиш учун идеал маскандир. Бу ердан топилган динозаврлар излари ҳудудни янада сирли кўрсатади.
Карижини, Австралия
Марсга саёҳат қилишни орзу қилсангиз, ўз сайёрамиз ҳақида кўпроқ маълумот билишингиз лозим. Бу борада икки миллиард йиллик Карижини миллий боғи сизга маъқул келади. Қадимги даралар ва дунёдаги энг қадимги қизил тошлар орасида ўзингизни макон ва замон оралиғига тушиб қолгандек ҳис этасиз.
Миватн кўли, Исландия
Музлар ва олов мамлакати — Исландия ўзининг ғайриоддий табиати билан машҳур. Ушбу ажойиб оролнинг шимолида жойлашган Миватн кўли ва унинг атрофи қачонлардир қотиб қолган лава оқими билан қоплангани сабабли Марсдаги ландшафтларни эслатади.
Сесрием, Намибия
Ҳаёт аломатлари деярли йўқ чўлда жойлашган кичик аҳоли пункти Марсга жуда ўхшайди. Бу ер Қизил сайёрадаги ҳаётга мослашиш учун энг зўр жой! Ушбу ажойиб ҳудудни томоша қилишнинг энг яхши усули — сайёҳлик маршрутидан фойдаланган ҳолда ҳаво шарларида сайр қилишдир.
Изоҳ (0)