Ҳомиладорлар учун мода қоидалари: Бўлажак оналар қандай қилиб замонавий кўринишга эга бўлиши мумкин? (фото)

Аёл киши ҳар қандай ҳолатда ҳам гўзал кўриниши мумкин, бунинг учун ҳомиладорлик тўсиқ бўла олмайди. BeOn Style мода мактабининг стилисти Анна Айвазян билан биргаликда бўлажак она қандай қилиб ўзини қулай ҳис қилиши ва ажойиб кўринишда бўлишини билиб олиш мумкин.

Ҳомиладор аёлларнинг гардеробидан асосан баданга ёқимли ва ҳаракатга тўсқинлик қилмайдиган табиий матоли кийимлар жой олиши керак. Соат сайин ўсиб бораётган болага ноқулайлик туғдирмаслик учун қорин соҳасини ҳеч нарса сиқиб турмаслиги жуда муҳим.

Мос келадиган либос учун, албатта, махсус дўконларга бориш шарт эмас. Ҳозирда жуда кўп кийимлар оверсайз услубида бичилган бўлиб, улар ҳомиладорлар учун ҳам бир қанча қулайликлар яратади. Худи ёки жемперларнинг кенг бичимдагилари нафақат ҳозирги ҳолатда, балки фарзанд дунёга келганидан сўнг ҳам фойдали ҳисобланади.

Ҳар бир аёл она бўлишга тайёргарлик кўраётган вақтда, албатта, бир саволни беради: ҳомиладор аёл ёпишиб турувчи либос кийиши керакми ёки йўқ? Кўпгина юлдузлар эса ўзининг ҳолатини намоён қилиш мақсадида шундай либос кийиши мумкин. Агар ҳомиладор аёл вазни меъёрдан ортиқ бўлмаса, матоси юмшоқ ва табиий бўлган либосларни истаганича кийиши мумкин. Аммо зич, қаттиқ ва эластик бўлмаган матолардан қочиш тавсия этилади. Улар ноқулайлик билан бирга, танада ёриқ ва бурмаларни ҳосил қилади.

Бу даврда гардеробдаги либослар ўлчам танламаслиги керак. Безакларга бой ҳамда мураккаб бичимга эга либослар ҳар ҳафта ўзгариб бораётган қоматга тўғри келмаслиги мумкин. Иложи борича оддий услубларга аксессуарлар ёрдамида безак бериш тавсия этилади.

Ҳомиладорлик даврида ноқулай оёқ кийим ва оғир сумкалардан чекланиш керак. Шунингдек, қаттиқ белбоғларни бироз кейинга қолдирган маъқул. Агар белга урғу бериш керак бўлса, юмшоқ ёки эластик белбоғлардан фойдаланиш керак. Шундагина улар ноқулайликларни келтириб чиқармайди.

Баланд пошналардан бутунлай воз кечиш шарт эмас. Муҳими, улар 4-5 сантиметр баландликда бўлиши керак. Ҳомиладорлик даврида оёқларнинг шишиб кетишини инобатга олган ҳолда уларнинг бироз каттароқ ўлчамдагисини харид қилиш мумкин. Шунинг учун ҳам бўлажак оналарга кўпроқ юмшоқ кеда, кроссовка ва ботинкалар тавсия этилади. Улар қулайгина бўлиб қолмай, аёлнинг образини ҳам бойитади.

Ҳомиладор аёллар қоринни тепаси билан қоплаб турувчи шимларга мурожаат қилганлари яхши. Уларни бироз узунроқ кардиган ёки жемперлар билан бирлаштириш мумкин.

Энг бахтли онларда ташқи кўринишни унутиш жуда катта хато. Гардеробдаги аксарият либослар энди мос келмай қолган бўлса-да, ажойиб тасвирлар билан ҳар ким ўзини қувонтириш имкониятига эга. Ёдда тутиш керак, ижобий ҳис-туйғулар соғлом ҳомиладорликнинг калитидир.