Миллионлаб мухлислари бўлган машҳурлар набираларининг кўриниши ва касб борасида танлаган йўллари ҳар доим ҳам буви ва бувалари сингари бўлавермайди.
Райли Кио — Элвис Преслининг набираси
Райлини Элвиснинг ягона қизи Лиза Мари Пресли дунёга келтирган. 12 ёшидан моделлик фаолиятини бошлаган Райли 14 ёшида Миланда бўлиб ўтган мода ҳафталигидаги Dolce&Gabbana чиқишида иштирок этган. Суратлари журнал муқоваларидан бир неча марта ўрин олган Кио 20 ёшида кинода ўзини синаб кўрган. 2012 йилда «Яхши шифокор» картинасида бош қаҳрамон ролини ижро қилганидан кейин «Жек ва Дайан» ҳамда «Телба Макс» лойиҳаларида иштирок этган. Суратга олиш жараёнида каскадёр Бен Смит-Петерсен билан танишган ва у билан ҳаёт йўлини боғлашга қарор қилган.
Жеймс Тьерре — Чарли Чаплиннинг набираси
Жеймс касб борасида ота-онаси ва бувасининг изидан кетганлардан ҳисобланади. Циркда фаолият юритадиган Тьерре ўзини кино оламида ҳам синаб кўрган ва «Просперо китоблари», «Шоколад» сингари фильмларда суратга тушган.
Анна Шарье — Брижит Бардонинг набираси
Бувисидан кам бўлмаган ҳусн ва истеъдодга эга Анна карьерасини театрда бошлаган, кейин эса фильмларда роль ижро этган. Илк дебют роли муваффақиятли чиққан актриса бугунги кунда бир қанча мукофотларни қўлга киритишга улгурган.
Кларк Жеймс Гейбл — Кларк Гейблнинг набираси
«Шамолларда қолган ҳисларим» юлдузининг набирасида муваффақиятга эришиш учун ҳамма нарса бўлган. Ўзига яраша кўринишга эга бўлгани унга моделлик оламида омадга эришишига ёрдам берган. Шунингдек, кинода суратга тушган Гейбл эркаклар кийими ҳамда электроника сотиладиган дўконларга ҳам эгалик қилган. Аммо ёш ва муваффақиятли Кларк 2019 йил 30 ёшида ҳаётдан кўз юмган.
Элисон Ле Борж — Ален Делоннинг набираси
Элисон Энтони Делон ва Мари-Элен Ле Борхеснинг қизи. Отаси тарк этгани сабаб онасининг қўлида катта бўлган Элисон 10 ёшида машҳур буваси билан танишган. Модель сифатида карьера бошлашга аҳд қилган қиз муваффақиятга мустақил эришиш мақсадида машҳур фамилиясидан воз кечган.
Роуз Шлоссберг — Жон Кеннедининг набираси
Жон ва Жаклин Кеннедининг катта набираси Роуз машҳур бувисига қуйиб қўйгандек ўхшайди. Нью-Йорк университетида санъатни ўрганган Роуз Гарвард талабаси бўлишга ҳам улгурган. Актрисаликка қизиқадиган Шлоссберг онлайн-сериалда бош қаҳрамон ролини ижро қилган.
Эмма Феррер — Одри Хепбёрннинг набираси
Бувисидан фарқли равишда актрисаликни танламаган Эмма Флоренциядаги санъат академиясида таҳсил олган. Машҳур актрисанинг набираси вояга етганидан кейин суратчилар, мода брендлари унга эътибор бериб, ҳамкорлик қилишни таклиф қила бошлаган. Бугунги кунда моделлик фаолияти билан шуғулланадиган Феррер Одри сингари хайрия ишларида ҳам фаол иштирок этиш билан бирга, ЮНИСЕФ билан ҳамкорликда ишлайди.
Изоҳ (0)