Фото: Қиролича Елизавета II қароргоҳи — Букингем саройига саёҳат

Дастлаб таунхаус сифатида ўйланган, Лондоннинг энг асосий рамзларидан бири бўлган Букингем саройи, 1703 йилда Букингем герцоги учун қурилган. Орадан 58 йил ўтгач эса қирол Жорж (Георге) III саройни рафиқаси қиролича Шарлотта учун сотиб олган.

XIX асрларга келиб архитекторлар Жон Неш ва Эдвард Блор томонидан марказий корпус атрофига учта «қанот» қурилиб бино майдони кенгайтирилган. 1837 йилга келиб қироллик қароргоҳи номини олган бино Букингем саройи деб атала бошлаган.

Дунёнинг энг ҳашаматли қароргоҳлардан бири деб эътироф этиладиган саройда 775 та хона мавжуд бўлиб, улардан 19 таси давлатга қарашли, 52 таси қиролича, унинг оиласи ва меҳмонлар учун қолган 188 таси ходимлар учун мўлжалланган.

Қолаверса, 92 та иш хонаси ва 78 та ваннани ўз ичига олган саройда бассейн, кинотеатр ва Лондондаги энг катта боғ мавжуд.

Шахсий қабул ва унча катта бўлмаган йиғилишлар саройдаги Оқ меҳмонхонада бўлиб ўтади. Шоҳона қандил ва мебеллар билан безалган мазкур хонанинг яна бир ўзига хослиги ойна ва шкаф ортида яширин эшик борлигида. Маълумотларга қараганда, қиролича айнан шу эшик орқали меҳмонлар билан кўришиш учун меҳмонхонага киради. Бундан ташқари, қироллик оила аъзоларини суратга олиш ва қироличанинг рождество табриги учун ҳам айнан шу меҳмонхонадан фойдаланилади.

Тилларанг ва қизил рангларни ўзида мужассам қилган тахт ўрнатилган хона эса асосан баллар учун мўлжалланган.

Яшил меҳмонхона ва унга туташ хоналарда эса кечки овқатдан аввал ичимликлар улашилади.

Ҳаворанг меҳмонхонадан қабуллар учун фойдаланилади.

Саройда, шунингдек, Рембранд, Рубенс ва бошқа буюк усталарнинг ишлари коллекцияларидан иборат санъат асарлари, қолаверса, француз ва инглиз мебеллари ҳам сақланади. Ҳар йили август ва сентябрда қиролича Букингем саройини тарк этади ва бу вақтда қароргоҳ эшиклари ташриф буюрувчилар учун очиқ бўлади.