Япония бош вазири Ёсихидэ Суга мамлакатда ёлғизлик ва яккаланишга қарши курашни бошқарадиган шахс учун лавозим жорий қилишни буюрди. Бу ҳақда «РБК» хабар берди.

Бош вазирнинг қарорига кўра, янги лавозимни ҳудудларнинг ҳаётий фаолиятларини қайта тиклаш вазири Тэцуши Сакамото эгаллайди. Сакамото бир вақтнинг ўзида иккита вазифани бажаради.

«Коронавирус тарқалиши оқибатида аёллар орасида ўз жонига қасд қилиш ҳолатлари кўпайди. Уларнинг муаммоларини ўрганиб, керакли чораларни кўришингизни истайман», — деди Суга.

Шунингдек, Сакамотога мамлакатда болаларнинг қашшоқлик ҳолатини кузатиш ва қарияларга ёрдамни мувофиқлаштириш вазифаси юклатилди.

Вазирнинг таъкидлашича, замонавий дунёда жамиятдаги одамлар ўртасидаги алоқалар аллақачон заифлашган ва коронавирус пандемияси уларнинг алоқаларини янада чеклаб қўйди.

Бу каби ёлғизлик вазири лавозими Буюк Британияда аввалроқ мавжуд эди, у 2017 йилда Британия ҳукуматининг собиқ раҳбари Тереза Мэй томонидан таъсис этилган.

Аввалроқ Японияда коронавирус фонида ўз жонига қасд қилиш ҳолатлари ўн йил ичида биринчи марта кўпайгани ҳақида хабар берилган эди.