Аввал хабар берилганидек, Ўзбекистон Президенти Шавкат Мирзиёев Фарғона вилоятига амалга оширган расмий ташрифи давомида Риштон туманида қурилган Халқаро кулолчилик марказини бориб кўрган.
Илгари риштонлик кулоллар ўз уйида, тор устахоналарда ишларди. Хорижлик туристлар учун шароит йўқ бўлган. Давлат раҳбарининг 2017 йил 17 ноябрдаги фармонидан кейин ҳунармандчиликни ривожлантириш ва ҳунармандлар учун кенг имкониятлар яратила бошланди. Мазкур фармонга мувофиқ, ўтган йилларда Қўқон ва Марғилон шаҳарларида ҳунармандчилик марказлари қурилган. Риштондагиси машҳур кулолчилик йўналишида бўлди.
Марказда 20 та икки қаватли кулоллар хонадони, Риштон тарихи музейи, банк хизматлари маркази бунёд этилган. Уйларнинг биринчи қаватида устахона ва савдо дўкони жойлашган, иккинчи қаватда ҳунармандлар оиласи яшайди. Хонадонларда 6 ўринли меҳмонхона ҳам мавжуд. Чет эллик сайёҳлар бу ерда яшаб, кулолларнинг иши билан танишиши мумкин.
«Дарё» мухбири давлат раҳбарининг ушбу марказга ташрифидан акс этган қизиқарли лаҳзаларни кадрларга муҳрлади.
Бу идишларда меҳнат билан, юрак билан бирга тарих ҳам бор. Ҳамма йўналишларда миллий анъаналаримизни тиклаяпмиз. Сопол буюмларни ҳам яна оммалаштириб, ҳар бир хонадонга киритиш керак. Уларни чет элликлар жуда қадрлайди. Чунки чиройли, сифатли, экологик тоза. Юртимиздаги ҳар бир уйда мана шундай идишлар бўлса, ҳам миллий ифтихор, ҳам маънавият бўлади.Шавкат Мирзиёев, Ўзбекистон Президенти
Президент таниқли кулоллар Музаффар Саидов ва Шарофиддин Юсупов хонадонига ҳам кириб, улар билан самимий суҳбатлашди.
Қурилиш жараёнида шу ердаги Хўжа Рушноий мақбараси обод қилинган эди. Давлат раҳбари ушбу мақбарани ҳам зиёрат қилди.
Шу ерда вилоятда «маҳаллабай» тизими асосида ёшлар ва аёлларни иш билан таъминлаш, камбағалликни қисқартиришга қаратилган чора-тадбирлар муҳокама қилинди.
Шавкат Мирзиёев ўз уйида тикувчилик цехи очиб, маҳалла хотин-қизларини иш билан таъминлаган учкўприклик аёллар билан мулоқот қилди. Улар фаолиятини кенгайтириши учун логистикага қулай жойда замонавий комплекс қуриб бериш бўйича мутасаддиларга вазифа қўйди.
Мавзуга доир:
- Шавкат Мирзиёев фарғоналик депутатларга: «Ижро ҳокимиятидан фарғонача эмас, сал аччиқроқ талаб қилишларингиз зарур»
- Шавкат Мирзиёев журналистларга: «Қўрқманглар, ортингизда Президент турибди»
- Шавкат Мирзиёев: «Ҳар бир ёш ҳақида ота-онаси қандай қайғурса, мен ҳам шундай қайғураман»
- «У ғўдаймаган, кўп-кўп оғир синовлардан ўтган» — Шавкат Мирзиёев Хайрулло Бозоров ҳақида
- Шавкат Мирзиёевнинг Ислом цивилизацияси марказига ташрифи — суратларда
- Шавкат Мирзиёев Ўзбекистоннинг Биринчи Президенти Ислом Каримов ҳайкали пойига гулчамбар қўйиб, унинг хотирасига ҳурмат кўрсатди (фото)
- Шавкат Мирзиёевнинг Бухоро шаҳридаги давлат хизматлари маркази ва IT Park’га ташрифи — суратларда
Изоҳ (0)