Россиянинг Нью-Йоркдаги бош консулхонаси АҚШ давлат департаментидан дипломатик миссиянинг хавфсизлигини таъминлашни сўради. 2 февраль куни бино ёнида норозилик акциялари бўлиб ўтди, дипломатик миссия биносига қизил бўёқ сепишди. Бу ҳақда «РИА Новости» хабар бермоқда.
«14:00 дан 20:00 гача бош консулхона биноси ёнида Россияга қарши митинг бўлиб ўтди, ниқоб кийиб олган номаълум шахс бир неча марта бўёқ отди. Биномизнинг олд томони, бир қисми қизил бўёққа бўялди», — дея маълум қилди элчихона ходими. Унинг сўзларига кўра, акция иштирокчилари сони тахминан ўн кишини ташкил қилган, улар нимани талаб қилгани ёки қандай шиорларни айтганига аниқлик киритилмади.
Бош консулхона даъво қилишича, ҳуқуқ-тартибот органлари илтимосларга қарамай, бино ёнида тартибни таъминламаган. «Иккидан саккизгача улар консулхона ёнига келишни имконсиз деб билди. Биз томонимиздан давлат департаментининг Нью-Йоркдаги хорижий ваколатхоналар бошқармасига бош консулхона хавфсизлигини таъминлаш ҳақидаги илтимос билан мурожаат юборилди», — деди дипломатик миссия вакили.
Эслатиб ўтамиз, 19 январь куни Россиянинг Нью-Йоркдаги бош консулхонасидаги барча телефон линиялари узилиб қолгани, шу билан бирга, интернет ва уяли алоқа билан боғлиқ муаммолар бўлгани хабар берилган эди.
Россиянинг Нью-Йоркдаги бош консулхонаси 1994 йилда очилган. У Манхэттен марказида 91-кўчада жойлашган бўлиб, Коннектикут, Иллинойс, Индиана, Мен, Массачусетс, Мичиган, Миннесота, Нью-Хемпшир, Нью-Жерси, Нью-Йорк, Огайо, Пенсильвания, Род-Айленд, Вермонт ва Висконсин штатларида яшайдиган Россия фуқароларига консуллик хизматларини тақдим этади.
Изоҳ (0)