«Муҳташам юз йил» мухлислари сериалдаги асосий қаҳрамонларни бошқа актёр ва актрисалар ижро қилиши мумкинлигини тасаввур ҳам қилолмайди. Лекин суратга олиш ишлари бошланишидан аввал мингдан ортиқ ижодкорлар синовдан ўтган ва улардан энг яхшилари саралаб олинган.
Ойку Челик
Томошабинлар Хуррам ролини Ойку ижросида кўриши мумкин эди, аммо продюсерлар актрисанинг қомати қаҳрамон учун тўлалик қилади деб ҳисоблаган. Роль учун асосий номзодлардан бири бўлган Челикни ролга олишдан воз кечилмаган, аммо шартнома ҳам тузилмаган. Сериал ижодкорлари Марямни суратга олиш ишлари бошланишидан бир неча ҳафта олдин топган ва Германияда яшайдиган ушбу актриса қаҳрамон учун айни муддао, деган фикрга келган. Бу вақтда Узерли туркчада яхши гапира олмайган. Бу ҳақида ўзи берган интервьюларида ҳам сўзлаб берган.
Ойку рад этилганини жиддий қабул қилмаган ва бошқа лойиҳаларда суратга тушишда давом этган. У томошабинлар қалбидан жой олиб улгурган «Эртуғрул: Тирилиш» сериалида роль ижро қилган.
Фаҳрие Эвжен
Бурак Ўзчивитнинг рафиқаси ҳам Хуррам роли учун номзодлик қилган. Нафақат ташқи кўриниши, балки истеъдоди билан ҳам мухлислар томонидан эътироф этиладиган актриса ҳам Ойку сингари ролга тасдиқланишини кутган, аммо Марям пайдо бўлган-у ҳаммаси ҳал бўлган.
Аслихан Гурбаз
Сериалда нафақат Хуррам, балки бошқа қаҳрамонларни ижро қиладиган актриса ва актёрлар танлаш борасида ҳам иккиланишлар кўп бўлган. Масалан, сериалдаги Шоҳсултон ролини Аслихан Гурбаз гавдалантириши мумкин эди.
Маълум бўлишича, актриса ушбу роль учун тасдиқланган, аммо сўнгги дақиқаларга келиб у билан ҳамкорлик қилишдан воз кечилган ва роль Дениз Чакирга насиб қилган. Шунга қарамай, бир неча йилдан кейин Гурбаз лойиҳанинг давомида суратга тушган. У «Косем»да Ҳалима султон сифатида намоён бўлган.
Чиғатай Улусой
Суратга олиш жамоаси султон Сулаймон ролини ижро қиладиган актёрни дарҳол топгани билан, шаҳзодалар учун муносиб номзодларни узоқ қидиришга тўғри келган. Кўплаб актёрлар шаҳзода Боязидни гавдалантиришни хоҳлаган. «Ичкарида» сериалидаги иштироки билан яхши таниш бўлган Чиғатай Улусой эса ушбу ролга тасдиқланишига бир бахя қолган. Аммо мазкур ижро учун Арас Булут Ийнемли олингани маълум қилинган.
Аммо бу Улусой учун унчалик катта йўқотиш бўлмаган. Келишган ва маҳоратли актёр айни вақтда ҳам фаол суратга тушиш билан банд. Netflix томонидан суратга олинган, унинг иштирокидаги «Ҳимоячи» сериали ҳам етарлича машҳурликка эришган. Арас Булутнинг эса истеъдодига шубҳа йўқ. «Чуқур» сериали юлдузи иштирокидаги «Еттинчи бўлмадаги мўъжиза» фильми Туркия томонидан «Оскар»га номзод қилиб кўрсатилган.
Метин Акдулгер
Метин сериалда Хуррам ва Сулаймоннинг ўғли, шаҳзода Салим ролини ижро қилиши мумкин эди. У синовдан ёмон ўтмаган, лекин роль Энгин Ўзтуркка насиб қилган.
Шунга қарамай, Метин ҳам кейинчалик «Косем»да суратга тушишга муваффақ бўлган.
Изоҳ (0)