«Сенинг статистиканг бир тийинга қиммат». Златан Ибрагимович ва Мино Райоланинг ҳамкорлик тарихи ҳақида

Машҳур футбол агенти Мино Райола ўз фаолиятини оилавий итальян ресторанида оддий ходим сифатида бошлаган. 2020 йил охирига келиб эса Forbes уни операциялардаги комиссиялар бўйича дунёдаги энг яхши спорт агентлари бешлигига киритди. Унинг мижозлари орасида Пол Погба, Эрлинг Ҳоланд, Маттейс де Лигт, Жанлуижи Доннарумма каби номдор футболчиларни учратиш мумкин. Бундай рўйхатга ҳатто Жорже Мендеш (Криштианунинг агенти) ҳам ҳавас қилиши мумкин. Бироқ Райоланинг мижозларидан бири алоҳида эътиборга лойиқдир. Унинг исми – Златан Ибрагимович.

39 ёшда одатда кўплаб футболчилар фаолиятини якунлашга тараддуд кўра бошлайди ва Осиё ёки MLS томон йўл олади. Ибра эса бу пайтда худди 25 ёшдагидек Италия А Сериясини ёндириб ташламоқда. Эҳтимол, фақат ғолиблик характерига эга бўлган дадил ва ўзига ишонган шведгина Райола каби мураккаб одам билан тенг шароитларда мулоқот қилиши мумкин. Хўш, барчаси қандай бошланган эди ўзи?

20 йилга орқага қайтамиз. Амстердам. Иқтидорлар билан тўла «Аякс» 2000 йилларнинг бошларида Кристиан Киву, Уэсли Снейдер, Рафаэл ван дер Варт ва бошқа кўплаб юлдузларни дунёга танитган. Улар орасида Златан учун ҳам жой бор эди, аммо ўша пайтда Нидерландияда ишлаган кўплаб агентлардан фарқли ўлароқ, Мино дастлаб швед билан шартнома имзолашга уринмаган. Райола «Аякс»да жуда кўп мижозларга эга эди, хусусан, бразилиялик ёш ҳимоячи Максвелл билан. Айнан Максвелл бу жамоада Ибрагимовичнинг энг яқин дўстларидан бири эди. Кунларнинг бирида «Аякс»дан машҳурроқ клубга ўтишни истаган Ибра бразилиялик дўстидан ўзини Райола билан учраштиришни сўрайди. Учрашув Амстел канали яқинидаги «Окура» меҳмонхонасида бўлиб ўтади.

Учрашув жойи жуда ҳашаматли кўринарди, шунинг учун Златан Райолани атрофга мос бўлишини тасаввур қилади. Porsche ҳайдаб келган, Gucci курткасидаги Rolex соатли Ибранинг тахминлари ўзини оқламади. Унинг ёнида оддий футболка ва жинсида тўладан келган ўрта бўйли одам пайдо бўлди.

«Сен шунчалик кам гол урасанки, бу ўйин услубинг билан циркда иш топишинг осонроқ кечарди», – дейди Райола Ибрага.

Райола ташқи қиёфа ва ҳашамат билан ўзини ҳайрон қолдириб бўлмаслигини аниқ айтади ва Златандан Porsche’ни Fiat’га ўзгартиришни, Rolex’ни эса сейфга қўйишга кўндиради. Дунёнинг энг яхшиси бўлиш учун швед ҳамма нарсадан воз кечиши ва ўзини футболга 100 фоизга бағишлаши керак эди.

«Сен машиналаринг, соатларингни сотасан ва уч баравар кўпроқ машқ қиласан. Чунки сенинг статистиканг бир тийинга қиммат»,

Албатта, дастлаб Ибра учун қимматбаҳо нарсалардан воз кечиш мушкул кечди, аммо Райоладан ўтган совуққонлик шведнинг ҳаётга бўлган қарашларини ўзгартиришга ва футболдаги келажаги тўғрисида жиддийроқ ўйлашга мажбур қилди. Шундан кейин унда ғолиблик руҳи шаклланди ва ҳар қандай вазиятда ҳам ўзини тўлалигича бағишлашга одатланди. Ҳатто машғулотларда ҳам.

Бир сафар «Утрехт»га қарши ўйинда «Аякс»нинг ўша пайтдаги бош мураббийи Рональд Куман Ибрагимовични алмаштиради. Шунда у шу қадар ғазабланадики, ҳатто реклама устунларини тепишгача боради. Ўша пайтда Златанда ҳар доим ўйинлардан сўнг Минога қўнғироқ қилиш одати бор эди, аммо бу сафарги суҳбат унинг тақдирини ўзгартириб юборади. Суҳбат давомида «Аякс»дан кетиш истаги ҳақидаги гапга жавобан швед қуйидагиларни эшитади: «Ушбу ҳолатда сен Туринга боришинг мумкин». Шу тариқа 2004 йилнинг 31 августида Златан 16 миллион доллар эвазига «Ювентус»га трансфер қилинади.

Шундан сўнг Златаннинг фаолиятида янги давр бошланди. Италиянинг уч гранди –  «Барселона», ПСЖ, «Манчестер Юнайтед» билан муваффақият, Швеция терма жамоасидаги етакчилик ва бир қанча совринлар.

Райола билан узоқ муддатли муносабатлар, шубҳасиз, Ибрагимовичнинг футбол дунёқарашига таъсир ўтказди. Ёш ўз сўзини айта бошлади – швед тобора кўпроқ жароҳат оларди, аммо футболга бўлган муҳаббат доимо устунлик қиларди. Шу тариқа 2017 йилда эҳтимолий нафақа ҳақида ҳеч қандай гап бўлиши ҳам мумкин эмасди.

«У яна 5–6 йил ўйнаши мумкин. Мен унинг фаолиятини якунлашига йўл қўймайман, энди у мен учун ишлаши керак. Фарзандларим катта бўлиб қолди, менга пул керак».

MLS’га («Лос-Анжелес Гэлакси») қилинган саёҳат ҳам Ибрагимовичнинг фаолиятига нуқта қўймади. 39 ёшга келиб, у нафақат футбол ўйнамоқда, балки ўз буюклигини ҳам исботлаш билан биргаликда жамоага натижа олиб келиш истагига ҳам тўла. Ва ниҳоят, Райоланинг таъсири остида бир пайтлар дангасалик ва ҳашаматни севадиган киши ўзида энг кучли фазилатларни шакллантира олди, бу эса унга ҳаётининг бешинчи ўн йиллиги остонасида ҳам футболда навқирон бўлиб қолиш имконини бермоқда.

«Бизнинг муносабатларимиз жуда яхши. Златан билан биз ақл бовар қилмайдиган саргузаштларни бошдан кечирганмиз. У кўринганидек баджаҳл одам эмас», – дейди Райола Златан ҳақида.

Орадан 10 йил ўтиб «Милан»нинг Скудетто ҳақидаги ўйлари энди утопик бўлиб кўринмаяпти, боиси Стефано Пиоли жамоасида кўп тўсиқларни енгиб ўтган қатъиятли Златан мавжуд. Ва эҳтимол, Златан ушбу потенциал ғалабасини «телбанамо» оғайниси Мино Райолага бағишлайди.

Манба