Андижон вилоятининг Бўстон туманида яшовчи С.Ш., С.С., О.Р. вояга етмаган фарзандлари учун тўланиши лозим бўлган алимент пулини ўз вақтида тўламагани учун 15 суткага қамалди. Бу ҳақда «Дарё»га МИБ вилоят бошқармаси ахборот хизмати маълум қилди.
Айтилишича, фуқаролик ишлари бўйича Бўстон туманлараро судининг 2019 йил 22 февралдаги суд қарорига асосан қарздор С.Ш.дан ундирувчи У.Ш. фойдасига 3 нафар вояга етмаган фарзандининг моддий таъминоти учун ойлик даромадининг 1/2 қисм миқдорида алимент ундириш белгиланган. МИБ Бўстон туман бўлими ходимлари томонидан ижро ҳаракатлари давомида қарздор бир неча маротаба оғзаки ва ёзма равишда огоҳлантирилишига қарамай, салкам икки йил давомида жами 24 миллион сўмга яқин алимент пулини тўлашдан бўйин товлаб келган. Шу сабабли қарздор С.Ш.га нисбатан 2021 йил 14 январь куни маъмурий баённома расмийлаштирилиб, тўпланган ҳужжатлар жиноят ишлари бўйича Бўстон туман судига юборилган. Суд ишни кўриб чиқиб, қарздор С.Ш.га нисбатан 15 сутка қамоқ жазоси тайинлаган.
Шунингдек, суд буйруғига асосан яна бир қарздор С.С.дан ундирувчи О.С. фойдасига икки нафар фарзандининг моддий таъминоти учун даромадининг 1/3 қисм миқдорида алимент ундириш белгиланган бўлса-да, қарздор жами 8 миллион сўм алимент пулларини тўламасдан келган.
Яна бир қарздор О.Р. ҳам оталик масъулиятига бефарқлик билан қараб, суднинг ижро ҳужжатини бажармагани оқибатида икки нафар фарзанди учун тўлаши керак бўлган алимент қарздорлиги 12 миллион сўмдан ошган.
Мазкур ҳолатлар бўйича тўпланган иш ҳужжатлари ҳам жиноят ишлари бўйича Бўстон туман судига юборилган бўлиб, суд жараёнида алиментдан қарздорларга 15 сутка қамоқ жазоси тайинланган.
Мавзуга доир:
- Бухоролик ота ўз фарзандларини моддий таъминлашдан бўйин товлагани учун 3 ойга озодликдан маҳрум этилди
- Андижонлик ота 2 нафар вояга етмаган фарзанди учун 4 минг доллар алимент пулини биратўла тўлаб берди
- Самарқандлик ота 4 нафар вояга етмаган фарзанди учун 42 млн сўм алимент пулини бирданига тўлаб берди
Изоҳ (0)