Наманганда вилоят ҳокими маҳаллий кенгаш депутати этиб сайланди

Наманганда халқ депутатлари вилоят кенгашининг ўн олтинчи сессияси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Сессияда жорий йил 10 январь куни халқ депутатлари вилоят кенгаши депутатлигига ўрни бўшаб қолган 6-Сероб ва 33-Навоий сайлов округларида ўтказилган сайлов якунлари ва сайланган депутатларнинг ваколатларини эътироф этиш ҳақидаги масала ҳам кўриб чиқилди.

Вилоят сайлов комиссиясининг жорий йил 12 январдаги қарори билан 6-Сероб сайлов округидан вилоят ҳокими Шавкат Абдураззоқов ва 33-Навоий сайлов округидан «Доктор-А» МЧЖ таъсисчиси Ёқуб Аҳмедовнинг вилоят кенгаши депутатлари этиб сайлангани маълум қилинди.

Сайлов комиссияси маълумотларига кўра, Шавкат Абдураззоқов сайловда иштирок этганларнинг 83,3 фоиз, Ёқуб Аҳмедов эса 56,1 фоиз овозини тўплаган.

Сессияда уларга депутатлик гувоҳномаси ва кўкрак нишонлари топширилди.

Маълумот учун, халқ депутатлари Наманган вилоят кенгашига 6-Сероб округидаги ўрин собиқ вилоят ҳокими Хайрулло Бозоровнинг депутатлик ваколатини муддатидан аввал соқит қилишни сўраб ёзган аризасига кўра, 33-Навоий сайлов округидаги ўрин эса депутат Ислом Тайрбаевнинг вафот этганлиги муносабати билан бўшаб қолган эди.