Мудофаа вазири Баҳодир Қурбоновга генерал-лейтенант ҳарбий унвони берилди. «Kun.uz»нинг маълум қилишича, вазирлик матбуот хизматига бу маълумотни тасдиқлади.
13 январь куни президент Шавкат Мирзиёев фармонига мувофиқ, Ўзбекистон Қуролли Кучлари ташкил этилганининг 29 йиллиги ҳамда Ватан ҳимоячилари куни муносабати билан ҳарбий хизматчилар ва ҳуқуқни муҳофаза қилиш органлари ходимларидан бир гуруҳи ҳарбий унвонлар, орден ва медаллар билан тақдирланган эди. 14 январь куни мукофотларни топшириш маросими бўлиб ўтди.
Хабарда айтилишича, мудофаа вазири Ватан ҳимоячилари куни муносабати билан Тошкент шаҳридаги Халқлар дўстлиги саройида ўтказилган байрам дастурида ҳам генерал-лейтенант ҳарбий унвонли формада меҳмонларга Президент табригини ўқиб эшиттирган.
Маълумот учун, Баҳодир Қурбонов 2015—2018 йилларда Тошкент шаҳар Ички ишлар бош бошқармаси бошлиғи сифатида ишлаган, 2018 йил февралида унга генерал майор ҳарбий унвони берилиб, Тошкент ҳарбий округи қўшинлари қўмондони лавозимига тайинланган. 2019 йил февралида эса у Ўзбекистон мудофаа вазири сифатида иш бошлаганди.
Изоҳ (0)