Ўзбекистон электр станцияларидаги муаммолар туфайли Афғонистон электр таъминотида узилишлар кузатилди – ОАВ

Ўзбекистон электр станцияларидаги техник муаммолар туфайли Афғонистонга етказиб бериладиган электр қуввати 450 мегаваттдан 300 мегаваттгача тушиб кетди. Шу сабабли Кобулнинг аксарият қисми электр энергияси билан боғлиқ қийинчиликларни бошдан кечирди, деб хабар қилди ТОLOnews’га таяниб «Gazeta.uz».

Нашрнинг ёзишича, сўнгги бир неча кун ичида Кобулнинг аксарият ҳудудларида яшовчилар электр энергияси танқислигига дуч келган. Ушбу кунлар давомида аҳолига электр энергияси кунига атиги 20 дақиқа етказиб берилган.

ТОLOnews’нинг Da Afghanistan Breshna Sherkat (DABS) энергетика компаниясининг вакилига асосланиб хабар қилишича, айни вақтда Ўзбекистондан Афғонистонга етказиб бериладиган электр қуввати 300 мегаваттдан 400 мегаваттга кўтарилган.

ДАБС ўз баёнотида энергия қуввати Ўзбекистон электр станцияларидаги техник носозликлар туфайли камайганлигини маълум қилди. Компаниянинг таъкидлашича, етказиб берилаётган электр энергиясининг кўпайиши электр таъминотидаги узилишларни камайтирган.

Кҳаама Пресс нашри Афғонистонга Ўзбекистондан етказиб берилган электр қуввати 300 мегаваттдан паст бўлганини таъкидлади. ТОLOnews таъминот узилишидан аввал бу кўрсаткич 450 мегаватт бўлганини қўшимча қилди.

Ўзбекистон Энергетика вазирлиги «Gazeta.uz»га ҳозирда электр энергияси шартномавий ҳажмининг 85 фоизи етказиб берилаётганини тасдиқлади. Ўзбекистон Миллий электр тармоқлари корхонаси афғон оммавий ахборот воситаларида тарқатилган хабарларга изоҳ бермади.

Маълумот учун, Миллий электр тармоқлари корхонаси ҳамда Da Afghanistan Breshna Sherkat компанияси ўртасида 10 йил муддатга электр энергиясини етказиб бериш тўғрисида битим имзоланган.

Эслатиб ўтамиз, 5 январь куни Ўзбекистондаги бир қатор иссиқлик электр станцияларида қисман электр узилишлари юз берди ва бу Қозоғистон жанубида ва Қирғизистоннинг айрим ҳудудларида электр энергиясининг узилишига олиб келди. 7 январь куни эса Энергетика вазирлиги Ўзбекистон ИЭСлари ва мамлакат энергетика тизимининг ишлаш тартиби тўлиқ тикланганини маълум қилганди.

«Review.uz» маълумотларига кўра, Афғонистон электр энергиясининг асосий қисмини қўшни давлатлардан импорт қилади. 2017–2018- йилларда импортнинг умумий ҳажми 4,6 миллиард киловатт соатни ташкил этди. Унга кўра, Ўзбекистон – 2 миллиард киловатт соат, Тожикистон – 1,2 миллиард киловатт соат, Эрон – 724 миллион киловатт соат, Туркманистон – 658,8 миллион киловатт соат энергия етказиб берган.