Таиланддаги ресторанларнинг бирида 45 йилдан буён тўхтовсиз равишда гўштли рагу пиширилади

Бангкокнинг Эккамай туманида ресторанга ташриф буюрувчилар учун 45 йилдан буён мол гўштидан рагу таоми пиширилади, деб хабар беради «РИА Новости».

Наттапонг Кавиантавонг ота-онасидан кейин ҳам анъанани давом эттирган ҳолда «абадий» таом тайёрлаб келмоқда. «Кўпчилик бизни ҳеч қачон қозонни тозаламайди, деб ўйлайди. Аммо ундай эмас, ҳар куни кечки пайт рагу бошқа идишга олинади ва идишлар тозалаб ювилади. Шундан сўнг шўрва бир кеча давомида қайнатишга қўйилади», − дейди у.

Эртанги ташриф буюрувчилар учун таом туни билан пиширилади. Ресторан мижозларига манзур келувчи ушбу таом 45 йилдан буён тайёрланиб келмоқда. Шўрва тайёрлашнинг аниқ бир рецепти йўқ, ундаги масаллиқлар миқдорини синаб кўриш мумкин. Таомга ўнлаб хитой ўтлари, саримсоқ, долчин, қора мурч, кашнич илдизи ва 70 килограмм гўшт қўшилади. Мол гўшти юмшоқ бўлиб пишиши ва зираворлар таъмини олиши учун тахминан 7 соат давомида қайнатилади. Уч соат катта бўлак ҳолида, тахминан 4 соат майдаланган шаклда.

Гавжум кўчанинг пиёдалар йўлакчасида турган диаметри 1,5 метр, чуқурлиги 76 сантиметр бўлган катта қозон одамларнинг эътиборини тортади. Маҳаллий аҳолининг таъкидлашича, улар бу таомнинг таъмини болалигидан буён билади. Таомнинг мазаси сира ҳам ўзгармаган. Бонгкокка ташриф буюрган кўплаб хорижликлар, албатта, ушбу ресторанда меҳмон бўлмай кетмайди. Шунингдек, профессионалларнинг «абадий шўрва»га берган баҳоси сифатида  ресторан Мишлен юлдузи ва бошқа нуфузли мукофотлар билан ҳам тақдирланган.