Андижонда жонига қасд қилган набирасини қутқариш учун ўзини каналга ташлаган отахоннинг жасади 9 кун ўтиб топилди

Андижон вилоятининг Балиқчи туманида сувга чўкиб кетган 18 ёшли набирасини қутқариш учун ўзини каналга ташлаб, ҳалок бўлган 65 ёшли отахоннинг жасади орадан 9 кун ўтиб топилди. Бу ҳақда «Дарё» мухбири Умиджон Мамарасулов хабар берди.

Маълум бўлишича, 2020 йил 16 декабрь куни соат 15:00 да Балиқчи туманида яшовчи 18 ёшли қиз ўз жонига қасд қилиш учун ўзини уйининг ёнидан ўтган Қорадарё каналига ташлаган. Буни кўрган 65 ёшли бобоси эса набирасини қутқариш учун ўзини сувга отган. Лекин оқим кучлилиги ва сувнинг совуқлиги вазиятни оғирлаштирган ва иккиси ҳам сувга чўкиб кетган.

Вилоят фавқулодда вазиятлар бошқармасининг маълумот беришича, 65 ёшли отахон ва унинг 18 ёшли набирасини қутқариш учун 26 кишидан иборат гуруҳ ташкил этилиб, жасадларни сувдан чиқариб олиш чоралари кўрилган.

Қутқарув ишлари 9 кун давом этган бўлиб, бобо ва набираси чўкиш ҳолати содир бўлган жойдан, тахминан, 10 километр узоқликдан топилган.

Ҳозирда қизнинг нима сабабдан ўзини сувга ташлагани ўрганилмоқда.