Дунёга машҳур поп-қўшиқчи Майкл Жексоннинг «Неверленд» қўрғони 22 миллион долларга сотилди, деб хабар беради The Wall Street Jounal.
Маълумотларга кўра, Yucaipa Companies инвестиция фирмаси борасида Жексоннинг молиявий масалалар бўйича шериги ва таъсисчиларидан бири бўлган миллиардер Рон Беркли «Неверленд»нинг янги эгасига айланган.
Жексон ушбу ранчони 1987 йилда 19,5 миллион долларга сотиб олган, бироқ 2008 йилда молиявий қийинчиликлар сабаб қўшиқчи кредит бўйича мажбуриятларини бажара олмаган ва мулкнинг улуши Colony Capital инвестиция компаниясига ўтиб кетган.
2015 йилда қўрғон 100 миллион доллар қийматида сотуга қўйилган бўлиб, шундан буён бир неча бор унинг нархи пасайган.
«Неверленд» Калифорнияда, Санта-Барбарадан тахминан 65 километр узоқликда жойлашган. Жексон у ерда 1987 йилдан 2009 йилга қадар яшаган.
Жексон қўрғон ҳудудига темир йўл ётқизган ва уй олдида гуллар билан «Неверленд» деган ёзув туширилган. Ранчо «Питер Пен» фантастик олами шарафига номланган. Қўшиқчининг ўлимидан сўнг, 2009 йилда кўчмас мулкнинг номи ўзгартирилган.
Қўрқон 1000 гектардан ортиқ майдонга эга. Ҳозирда унинг ҳудудида 22 та турли бинолар жойлашган бўлиб, улар орасида норманд услубидаги қасрлар, бир нечта меҳмонхона, бассейн, баскетбол майдони, теннис корти ва 50 кишига мўлжалланган кинотеатр жойлашган.
Эслатиб ўтамиз, Майкл Жексон 2009 йили 50 ёшида вафот этган. Унинг ўлимига шахсий шифокори Конрад Мюррей томонидан тайёрланган анестетика инъекцияси сабаб бўлган.
Мавзуга доир:
Изоҳ (0)