Ёш тиктокерларнинг ҳозирги ишлари кимгадир енгил-елпи кўрингани билан, вақт ўтиб улар улғайгач, нисбатан жиддийроқ ва яхшироқ видеолар олади. Бу ҳақда Тошкент шаҳар ҳокими Жаҳонгир Ортиқхўжаев 23 декабрь куни бўлиб ўтган Tashkent City TikTok Awards 2020 тақдимотидаги чиқишида айтиб ўтди.
Аввалроқ ҳоким бу тадбирни «нафақат Ўзбекистонда, балки дунёдаги биринчи тиктокерлар байрами» деб атагани ҳақида хабар берилган эди. Тадбирда Ортиқхўжаев «Йил тавсияси» йўналишида энг яхши деб топилган Littos дуэти вакилига мукофот ва совғалар топширган.
«Биз ҳар доим сиз билан биргамиз. Ҳозир сиз олаётган видеолар ким учундир енгил-елпи кўринар, лекин бу сизнинг ёшингиз категорияси. Ёшингиз улғайгач, нисбатан жиддийроқ, яхшироқ видеолар ҳам оласиз. Ҳозир сизларни қўллаб-қувватласак, ўйлайманки, клипларингиз, материалларингиз дунёга чиқади. Зотан, дунёга чиқиб бўлдингиз ҳам», — деб айтган ҳоким Жаҳонгир Ортиқхўжаев ўз чиқишида.Ҳокимнинг: «Бугунги байрам ёқяптими?», деган саволига йиғилганлар қарсаклар ва хурсандчилик ҳайқириқлари билан жавоб қайтарган.
Бу Жаҳонгир Ортиқхўжаевнинг тиктокерлар ҳақида биринчи марта илиқ фикр билдириши эмас. Аввалроқ, Тошкент ёшлар форуми очилишига бағишланган матбуот анжуманида бугун аҳамиятсиз бўлиб кўринаётган тиктокерлар эртага аҳамиятли шахсга айланиб қолиши ҳеч гап эмаслигини таъкидлаган эди.
«TikTok’ни интернет оламининг бир қисми деб биламан... Юртимизда тиктокерларга тақиқ қўйиш эмас, уларни тўғри йўлга йўналтириш бўйича иш олиб боришимиз керак. Ёшларга тўғри йўл кўрсатиб, уларга тўғри йўналиш кўрсатиб, қилаётган ишларидан самарали фойдаланса бўлади, деб ўйлайман», — деганди ўшанда ҳоким.
Изоҳ (0)