Ижтимоий тармоқларда Фарғона вилоятида Янги йил арчаси ёнаётгани тасвирланган видео тарқалди. «Дарё» мухбирининг аниқлик киритишича, ёнаётган арча Фарғона шаҳридаги марказий деҳқон бозори олдига ўрнатилган арча бўлган.
Таъкидланишича, Янги йил арчаси ўрнатилаётган пайтда арчани безаб турган чироқларда қисқа туташув сабаб ёнғин келиб чиққан ва арча тўлиқ ёниб кетган.
Фарғона вилоят Фавқулодда вазиятлар бошқармаси берган маълумотга кўра, бошқармага арча ёнаётгани тўғрисидаги хабар 2020 йил 23 декабрь куни соат 13:26 да келиб тушган.
Ёнғинни бартараф қилиш учун 1 та ёнғин қутқарув экипажи жалб этилган. Чақирувга соат 13:27 да чиқилиб, 13:30 да етиб борилган. Ёнғин 13:31 да қуршаб олиниб, 13:33 да тўлиқ ўчирилган. Ёнғин оқибатида жароҳат олганлар ва қурбонлар йўқ.
Ҳозирда ҳолат юзасидан терговга қадар суриштирув ҳаракатлари олиб борилмоқда.
Фавқулодда вазиятлар бошқармаси уйлар, ишхоналар ва бошқа муассасаларда арча ўрнатишда хавфсизлик қоидаларига риоя қилишга чақирган.
Изоҳ (0)