Қаршида ЙПХ автомобили ёниб кетди. Ҳолат юзасидан ЙҲХББ изоҳ берди

Ижтимоий тармоқда «Қарши шаҳрида ГАИ автомашинаси ёниб кетди» сарлавҳаси остидаги видеолавҳа тарқалди. Воқеа юзасидан ИИВ ЙҲХББ баёнот берди.

Маълум қилинишича, 2020 йилнинг 18 декабрь куни соат 16:50 ларда Қашқадарё вилояти Қарши шаҳри Мустақиллик кўчасида жойлашган вилоят ҳокимлиги биносининг рўпарасида вилоят ИИБ ЙҲХБ ЙПХ ходими М.Оймуродов бошқарувидаги Lacetti русумли махсус хизмат автомобилининг двигатель қисмида ёнғин юзага келган.

Ёнғин натижасида тан жароҳати олганлар йўқ. Ёнғин тез фурсатларда бартараф этилган. Транспорт воситасининг двигатель ва капот қисми зарарланган.

Мазкур ҳодиса юзасидан Қарши шаҳар ИИБ ЙҲХБ ва ФВБ томонидан суриштирув ишлари олиб борилиб, ёнғин юзага келиш сабабларига аниқлик киритилмоқда.

Аввалроқ Жиззахда хизмат машинаси йўл қоидасини бузган ЙПХ ходимига чора кўрилгани, Тошкентда йўл қоидасини бузган ЙПХ ходими жаримага тортилгани ҳамда Сирдарёда ҳайдовчининг телефонини олиб қўйган ЙПХ ходими лавозимидан озод этилгани ҳақида хабар берилганди.