«Уфа» раҳбари Сергей Юраннинг гаплари ҳақида: «Остон Ўрунов ёш, шу сабаб у ҳали буюк футболчи бўлолмади»

«Уфа» футбол клуби директорлар кенгаши раҳбари Ростислав Мурзагулов «СКА-Хабаровск» бош мураббийи Сергей Юраннинг ўзбекистонлик ярим ҳимоячи Остон Ўрунов ҳақидаги гапларига муносабат билдирди.

Аввалроқ Юран Ўрунов кўрсатилганидан 4-5 ёшга катталигини айтганди.

«Сергей Юран — футбол оламида улкан обрўга эга шахс, бироқ ўйлашимча, геронтологияда (тирик организмлар, жумладан, одамнинг қариш жараёнини ўрганадиган фан — изоҳ «Дарё») ундан кучлироқ мутахассислар бор. Остонга ҳатто четдан қарасангиз ҳам, унинг анча ёш экани яққол кўринади. Айнан шунинг учун у ҳали буюк футболчи бўлолмади.

Юран айтган ёшга етганида Остон ҳақиқатда катта ўйинчига айланади. Юранга эса ҳозирги клубида муваффақиятлар тилайман», — дейди Мурзагулов.

Ўрунов 2019/20 йилги мавсумнинг иккинчи ярмида «Уфа» сафида РПЛда 10 ўйин ўтказган. Ёзги трансфер ойнасида 19 ёшли футболчи Москванинг «Спартак» жамоасига ўтганди.

Остон Россия чемпионати 2020/21 йилги мавсумида 8 та ўйинда майдонга тушди (бир марта асосий таркибда) ва бирорта ҳам самарали ҳаракат амалга ошира олмади.