«Крудслар оиласи 2» мультфильми бир ҳафта ичида яна 3 млн доллар тўплаб, Америка прокатида биринчи ўринни эгаллади

«Крудслар оиласи 2» сиквели Америкадаги прокатнинг учинчи ҳафтасида 3 миллион доллар ишлаб топди ва касса йиғимлари бўйича биринчи ўринни эгаллади. Эндиликда мультфильмнинг умумий касса йиғими ўз ватанида 24,1 миллионни, бутун дунёда эса 76,4 миллион долларни ташкил этмоқда, деб хабар беради «Film.ru».

Рўйхатнинг иккинчи поғонасидан 490 минг доллар ишлаб топган Focus Features студиясининг «Ўгай ака-укалар» драмаси эгаллади. Икки ҳафталик прокат давомида фильм 1,3 миллион доллар ишлаб топди. Унинг ортидан премьерасидан 17 йил ўтиб, прокатга чиққан Уилл Феррелл иштирокидаги «Эльф» Рождество комедияси ўрин олган. Картина дам олиш кунлари 400 минг доллар йиғишга муваффақ бўлган.

315 минг доллар йиққан Винс Вон иштирокидаги Freaky комедияси олдингидек топ рўйхатда жойлашган. Айни вақтда йиғимлар 8,2 миллион долларни ташкил этмоқда. Кучли бешликдаги комедиялар қаторига Роберт Де Ниро иштирокидаги The War with Grandpa якун ясаган. Фильм яна 260 минг доллар ишлаб топган.

Жорий ҳафтанинг янгилиги бўлган Эмили Блант ва Жейми Дорнан иштирокидаги «Ёввойи жуфтлик» мелодраммаси чекланган прокатда 100 минг доллар йиғишга эришди.