Меҳмонхонадаги уй, «самовий» маош, машиналар. Футбол оламини остин-устун қилиб юборган Пеп Гвардиола қандай ҳаёт кечиради?

Бугунги кунда замонавий футболни Хосеп Гвардиоласиз тасаввур қилиб бўлмайди. «Барселона» ҳам айнан унинг даврида мисли кўрилмаган ютуқларга эришган. Шунинг билан бирга у «Бавария» ва «Манчестер Сити»ни ҳам янги босқичларга олиб чиққани билан ҳам бемалол мақтана олади. Мухтасар айтганда, Пеп атиги 40 ёшида бутун футбол оламини остин-устун қилиб юборганди. Ҳозир у 49 ёшда. Хўш, четдан қараганда доимо алланималарни ўйлаб юрадиган даҳо қандай ҳаёт кечиради ўзи? Қуйида ушбу саволга тўхталамиз.

Қаерда яшайди?

Пеп Манчестер марказидаги City Suites меҳмонхонасида яшайди. Ушбу меҳмонхонада бир кеча тунаш нархи 75–230 фунт стерлингни ташкил қилади.

У ерда ҳашаматли ҳаёт учун керак бўлган ҳамма нарса мавжуд: сузиш ҳавзаси, спорт зали, бар, ресторан ва ҳоказолар.

Бино шаҳар марказида жойлашгани боис у ердан исталган жойга бориш қулай. Пеп «Etihad»га етиб олиш учун атиги 3 километр босиб ўтса бўлгани.

Аммо Пеп ушбу меҳмонхонадаги хонадонни ижарага олмаган, балки уни тўлалигича сотиб олган. Ушбу мулк испанияликка 2,7 миллион фунтга тушган. Айтишларича, бундан ташқари Пепнинг Нью-Йоркда ҳам уйи бор экан.

Машиналари

Шу паллада бир савол туғилади. Хўш, Гвардиола машиналарини клуб базасида сақлайдими ёки меҳмонхона автотураргоҳида? Боиси унинг ихтиёрида бир қанча машиналар бор.

Улар орасида Bentley, Audi, Mercedes компанияларининг машиналарини кўриш мумкин. Шунингдек, Пеп Range Rover ва Mini Cooper’га ҳам эгалик қилади.

Шахсий ҳаёт

Испаниялик даҳонинг рафиқаси Кристина Серра машҳурлик борасида ўзига тенг кела олмаса-да, етарли даражада таниқли. У Испанияда иккита мода бутикларига эгалик қилади. Шунга қарамай Кристина иложи борича оммага кўринмасликка ва интервьюлар бермасликка ҳаракат қилади. Бироқ у мунтазам равишда «Манчестер Сити» ўйинларига ташриф буюриб туради. Жуфтлик икки ўғил ва бир нафар қиз фарзандни вояга етказмоқда.

Дўстлари

Мураббийнинг дўстлари ҳақида гап кетганда, Пеп уларни имкон қадар ошкор қилмасликка ҳаракат қилади. Гвардиола ўзининг 48 ёшга тўлганида, журналистлар ундан ушбу байрамни ким билан нишонлаши ҳақида сўраган. Пеп эса бунга жавобан: «Уйда, оилам билан. Менинг дўстларим йўқ», – деганди.

Бироқ маълумотларга кўра, даҳо ёшлигидан «Барселона» собиқ бош мураббийи Тито Виланова билан жуда иноқ дўст бўлган. Титонинг бевақт ўлими эса Гвардиолага жуда қаттиқ зарба берган.

Шунингдек, испаниялик мураббийнинг «Реал» собиқ ҳужумчиси Рауль билан яқин муносабатларда эканлиги айтилади. Пеп «Бавария»га ўтиш ҳақида айнан Рауль билан маслаҳатлашган экан.

Футболдан ташқари қизиқишлар

Кўпчилик мухлислар билишадики, Гвардиола ҳар доим кийиниш услубига алоҳида эътибор қаратган. Ҳатто The Telegraph нашри 2017 йилда уни дунёнинг энг замонавий (кийиниш услуби борасида) эркаклар ўнлигига киритганди. Шунингдек, Пеп бўш вақтларида харид қилиш, овқат тайёрлаш, мусиқа тинглаш ва шахмат ўйнашни хуш кўради.

Даромади

Гвардиола футболда ўз имзоси, принциплари ва ютуқларига эга юқори даражадаги мураббийлардан ҳисобланади ва шунга яраша ҳақ талаб қилади. У «шаҳарликлар» билан ноябрь ойида имзолаган янги шартномасига (2023 йилгача мўлжалланган) кўра, йилига 22 миллион фунт маош олади. Таққослаш учун унинг ҳамкасби ва ҳамшаҳари Сульшерда бу кўрсаткич 7,5 миллион фунтга тенг.