Хитой вакцинасининг Ўзбекистондаги клиник синовлари бошланди, дея хабар бермоқда Инновацион ривожланиш вазирлиги.
Маълум қилинишича, вазирлик биносида 10 декабрь куни Ўзбекистонда янги коронавирус рекомбинант вакцинаси (CHО ҳужайра) халқаро клиник синовларининг 3-фазаси бошланишига бағишланган маросим ўтказилди. Маросимда бош вазир ўринбосари Беҳзод Мусаев, инновацион ривожланиш вазири Иброҳим Абдураҳмонов, Хитойнинг Ўзбекистондаги Фавқулодда ва мухтор элчиси Цзян Янь, Chongqing Zhifei Biological компаниясининг раиси ва бош директори Цзян Реншэн, Хитой Фанлар академиясининг Микробиология институти илмий ходимлари қатнашди.
Инновацион ривожланиш ҳамда Соғлиқни сақлаш вазирликлари томонидан Хитойнинг Хитой Фанлар академияси Микробиология институтининг ишланмаси асосида Zhifei Longcom Biopharmaceutical Co. Ltd компанияси ишлаб чиққан коронавирусга қарши вакцинанинг учинчи босқич клиник синовларини ўтказиш ишлари бошланди.
Хитойдаги Ўзбекистон элчихонаси ёрдамида Ўзбекистонга Zhifei компанияси томонидан 6000 дона синов вакцинаси (50 фоиз ҳақиқий вакцина, 50 фоиз плацебо), 12 минг дона ПЗР тестлар, 8 минг дона антитаналарни аниқловчи тестлар ҳамда барча ишлатиладиган ёрдамчи материаллар (шприц, ниқоб, кўзойнак, криопробиркалар, ҳомиладорлик тестлари) олиб келинди.
Клиник синовларни ўтказиш учун жами 5 минг нафар кўнгилли танлаб олинди. Жараённинг баъзи жиҳатларини эътиборга олган ҳолда кўнгиллиларнинг шахси ошкор қилинмаслигига келишилди.
Шунингдек, Zhifei Longcom Biopharmaceutical Co. Ltd компаниясининг 8 нафар мутахассислари Инновацион ривожланиш вазирлиги ҳузуридаги Илғор технологиялар маркази ҳамда Соғлиқни сақлаш вазирлигидаги Вирусология илмий-тадқиқот институти ходимлари билан биргаликда синов ўтказиладиган поликлиникалари врач ва ҳамширалари учун вакцинация тадбирларини амалга ошириш бўйича тренинглар ўтказди.
Мазкур компания томонидан ишлаб чиқилган ва ҳозирда клиник синовдан ўтиши бошланадиган вакцина коронавирус юза антигенининг генетик–муҳандислик оқсили бўлиб, у аденовирус ҳамда инактивлашган вакцина турлари билан таққосланганда юқори даражада хавфсиз ҳисобланади. Яъни рекомбинант оқсил кўринишидаги вакцина вируснинг бир бўлагини юқори технологиялар асосида сунъий кўпайтириб олишга асосланган. Генетик–муҳандислик оқсили зарарланган организмда айнан унга қарши антитаначалар ишлаб чиқаради.
Маълум қилинишича, вакцина 1- ва 2-фаза клиник синовларда нисбатан юқори хавфсизлик профилига эгалигини намоён этган. Инновацион ривожланиш вазирлиги раҳбариятининг 20 та кўнгилли оила аъзолари Хитойдан олиб келинган рекомбинант вакцина билан биринчи дозада эмланди.
Инновацион ривожланиш вазирининг биринчи ўринбосари Шаҳлохон Турдиқулова «Дарё» мухбири Мусулмонбек Иброҳимовга берган қисқача интервьюсида Хитой вакцинасининг Ўзбекистондаги клиник синовлари Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги рухсат берганидан сўнггина бошланишини маълум қилганди.
Эслатиб ўтамиз, 21 октябрь куни Инновацион ривожланиш вазирлиги коронавирусга қарши рекомбинант вакцинанинг клиник синовларини Ўзбекистонда ташкил этиш масаласи бўйича Хитой Фанлар академияси Микробиология институти ва Anhui Zhifei Longcom Biopharmaceutical компанияси вакиллари билан музокаралар ўтказган эди.
Фармацевтика тармоғини ривожлантириш агентлиги берган маълумотга кўра, вакцина устида сифат назорати текширувларини ўтказиш учун Инновацион ривожланиш вазирлигининг Илғор технологиялар маркази агентликка 21 октябрь куни эмас, балки 19 ноябрь куни тақдим этган. Хитой вакцинасининг плацебо намуналари ва тегишли стандартлар ҳамда реагентлар Фармацевтика тармоғини ривожлантириш агентлиги ҳузуридаги Давлат маркази томонидан қабул қилинган.
Аввалроқ инновацион ривожланиш вазири, биолог олим Иброҳим Абдураҳмонов Хитой вакцинасини ижобий баҳолаган. Вазир вакцина олувчилар 18 ёшдан 59 ёшгача бўлган битта гуруҳ, иккинчи гуруҳга эса 60 ёшдан юқори бўлганлар киришини таъкидлаб ўтган. Вакцинанинг ножўя хавфли таъсирлар пайдо бўлганда, яъни 15 фоиз одамларда шу ҳолат кузатилса, зудлик билан зарур чора-тадбирлар кўрилади ҳамда ўрганиш бошланади. Лекин бу агар 30 фоизга етадиган бўлса, вакцина синовлари тўхтатилади.
Соғлиқни сақлаш вазири Абдуҳаким Хожибоев 2020 йил охири ёки 2021 йил бошларида Ўзбекистон «Спутник V» вакцинасининг клиник синовларига киришишни мўлжаллаётганини маълум қилганди. Шунингдек, Ўзбекистон Россиянинг «Вектор» илмий маркази томонидан ишлаб чиқарилган «ЭпиВакКорона» вакцинаси рўйхатдан ўтказилгандан сўнг унинг қўшма синовларини ўтказишга қизиқиш билдирганди. Ҳиндистон ҳам коронавирусга қарши вакциналарини Ўзбекистонга таклиф қилган. Ўзбекистонда 2021 йилнинг июнига қадар 60 фоизгача аҳолини коронавирусга қарши эмлаш режалаштирилган.
Изоҳ (0)