Хорижга норасмий равишда чиқиб кетиб, қийин ва хавфли шароитларда қолган ўзбекистонлик меҳнат мигрантларига бевосита ёрдам кўрсатилмоқда. Ҳатто самолётда учиб кетиши ва 3 ойлик яшаши учун шароит яратиб бериш масаласида ҳам қонуний тадбирлар ишлаб чиқилган. Бу ҳақда 4 декабрь куни АОКАда ўтказилган матбуот анжуманида сўз юритилди, дея хабар бермоқда «Дарё» мухбири.

Бандлик ва меҳнат муносабатлари вазири ўринбосари Баҳодир Умрзоқовнинг таъкидлашича, ўтган икки йил ичида мигрантларга давлат томонидан ижтимоий ва моддий ёрдам кўрсатиш тизими йўлга қўйилган.

Фото: «Дарё»

«Охирги икки йил мобайнида энг муаммоли йўналишимиз бўлган меҳнат миграцияси масалаларига ҳам катта аҳамият қаратилиб, Президентимиз ва ҳукумат раҳбари томонидан бир қанча қарор ҳамда фармонлар имзоланди. Бу борада меҳнат мигрантларининг ижтимоий кафолатлари, меҳнат тарзи, уларни ўқитиш ва моддий ёрдам бериш масалаларигача, ҳаммаси ҳал этилиб, бир қатор ҳужжатлар қабул қилинди. Хорижга норасмий чиқиб кетган меҳнат мигрантларимиз қийин ва хавфли шароитларда қолган пайтларида давлат уларга бевосита ёрдам бермоқда. Ҳатто самолётда учиб кетиши, 3 ойлик яшаши учун шароит ва озиқ-овқат билан таъминлаб бериш масаласида ҳам қонуний тадбирлар ишлаб чиқилди», — деди Умрзоқов.

Унинг қўшимча қилишича, 2020 йилнинг январь—ноябрь ойларида хориждан 211 нафар мигрантнинг жасади давлат ҳисобидан олиб келинган.

«Энг оғири, меҳнат миграциясига кетганларнинг ҳалок бўлиши ёки жароҳат олишидир. Бу бўйича ҳам давлат томонидан ёрдам бериш мақсадида меҳнат мигрантларини ижтимоий ҳимоялаш жамғармаси ташкил этилди. 2020 йилда чет элдан салкам 211 кишининг жасади давлат ҳисобидан олиб келиниб, жанозалари ўтказилди. Дафн маросимлари ташкил қилиниб, оилаларига моддий ёрдам берилди», — деди вазир ўринбосари.